Давлат кадастрлари палатасининг Тошкент вилояти бошқармаси вилоятнинг Зангиота туманидан Тошкент шаҳрининг Сергели туманига ўтказилган ижтимоий объектлар тўғрисида маълумот берди.
Маълум қилинишича, Олий Мажлис Қонунчилик палатасининг 2021 йил 16 августдаги 1290-IV-сон ва Сенатнинг 27 августдаги СҚ-379-IV-сон қарорлари ижроси юзасидан Кадастр агентлиги ҳамда Давлат кадастрлари палатасининг Тошкент вилояти бошқармалари ҳамда ҳудудий бўлинмалари томонидан бир қатор ишлар амалга оширилмоқда. Хусусан, Тошкент вилоятининг Зангиота туманидан Тошкент шаҳрининг Сергели туманига қуйидаги ижтимоий объектлар ўтказилиши таъминланган:
- маҳаллалар – 13 та;
- кўп қаватли турар жойлар – 23 та;
- кўп қаватли турар жойлардаги хонадонлар – 335 та;
- якка тартибдаги уй-жойлар – 10 954 та;
- нотурар жойлар – 535 та;
- мактаблар – 7 та;
- мактабгача таълим муассасалари – 5 та;
- диний муассасалар – 2 та;
- қабристонлар – 4 та;
- маданият марказлари – 1 та;
- тиббий муассасалар – 2 та.
Эслатиб ўтамиз, 2020 йилнинг 5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Ўшанда аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган эди. Кейинроқ Улуғбек шаҳарчасининг аҳолиси Тошкент вилояти таркибига, шунингдек, Учтепа тумани яшовчилари учта маҳалла Тошкент вилоятининг Зангиота тумани таркибига ўтказишга қарши чиққанди.
2021 йил июль охирларида Халқ депутатлари Тошкент шаҳар кенгаши қарори билан пойтахтнинг Сергели, Бектемир ва Мирзо Улуғбек туманлари ҳудуди Тошкент вилоятининг Зангиота, Қибрай, Юқори Чирчиқ ва Ўрта Чирчиқ туманлари ҳисобига 7,8 минг гектардан кўпроққа кенгайтирилгани маълум бўлди.
Изоҳ (0)