Дунё ва ўзбек спортига оид 26 октябрь кунининг энг муҳим хабарлари дайжести билан танишинг.
Ўзбекистон
Белбоғли кураш бўйича илк марта Европа чемпионати ўтказилди2021 йилнинг 7—10 октябрь кунлари белбоғли кураш бўйича илк марта Европа чемпионати ўтказилди. Мусобақага Украинанинг Лвов шаҳри мезбонлик қилди.
Европа чемпионатида 100 нафарга яқин полвонлар 4 та вазн тоифаларида беллашди. Мусобақада бош ҳакамлик вазифасини халқаро тоифадаги ўзбекистонлик ҳакам Н.Тўйчиев бажарди. Ҳакамлар биринчиликдаги баҳсларда белбоғли курашда қўлланиладиган атамаларни соф ўзбек тилида талаффуз қилган.
Шунингдек, Лвов шаҳрида Украина белбоғли кураши бўйича ҳам Жаҳон чемпионати бўлиб ўтди. Ушбу чемпионатда Ўзбекистон номидан 4 нафар спортчи қатнашиб, 4 та медал қўлга киритди. Европа чемпионати ва украинча белбоғли кураш бўйича жаҳон чемпионати Жаҳон белбоғли кураш ассоциацияси президенти Азизбек Ғаниевнинг кўмаги остида ўтказилган.
Ҳасанбой Дўстматов ЖЧ—2021 ни тарк этди
Сербиянинг Белград шаҳрида бокс бўйича ЖЧ—2021 баҳсларининг 2-кунидан ўрин олган баҳслар ўтказилмоқда.
26 октябрь куни Ҳасанбой Дўстматов 1/8 финалда қозоғистонлик Сакен Бибоссиновга мағлуб бўлди ва мусобақани тарк этди. Одилжон Аслонов эса жангсиз кейинги босқичга йўл олди.
Шунингдек, 26 октябрь куни Саиджамшид Жаъфаров словакиялик боксчига қарши рингга кўтарилади.
Жаҳон
«Барселона» ва «Бока Хуниорс» клублари Марадона хотирасига бағишланган ўйинда иштирок этади
«Барселона» ва «Бока Хуниорс» клублари Диего Марадонанинг хотирасига бағишлаб, Ар-Риёдда (Саудия Арабистони) ўйин ўтказади. Бу ҳақда каталон клуби сайтида хабар берилди.
Учрашув 14 декабрь куни бўлиб ўтади. Марадона футболчилик фаолияти давомида ушбу клубларда фаолият юритган.
АПЛ футболчиларига коронавирусга қарши эмланганлик тўғрисида сохта сертификат таклиф қилинмоқда
Англия Премьер Лигаси футболчиларига коронавирусга қарши эмланганлик тўғрисида сохта ҳужжатлар таклиф қилинмоқда.
Daily Mail хабарига кўра, фирибгарлар Премьер Лига ўйинчилари билан алоқага чиқиб, уларга 1000 фунт стерлингга иккита сохта сертификат таклиф қилмоқда.
Лиганинг тўрт клуби пайдо бўлган фирибгарлик мавжудлигини тасдиқлаган. Лига эса бу ҳақда ҳеч нарса билмаслигини маълум қилган.
«Манчестер Юнайтед» Сульшерни истеъфога чиқармайди
«Манчестер Юнайтед» бош мураббийи Оле-Гуннар Сульшер истеъфога чиқарилмайди, деб ёзмоқда Sky Sports.
Нашрга кўра, клуб норвегиялик мутахассисни ишдан бўшатиш ҳақида ўйламаяпти. Фабрисио Романо эса Сульшерни ҳатто жамоанинг собиқ бош мураббийи Алекс Фергюсон ҳам қўллаб-қувватлаётгани ёзди.
Аввалроқ, «қизиллар» Антонио Конте билан алоқага чиққани ва унинг бу таклифга розилик билдириб, 3 йиллик битим хоҳлаётгани ҳақида хабарлар тарқалганди.
«Манчестер Юнайтед»ни олдинда «Тоттенҳэм» (30 октябрь), «Аталанта» (2 ноябрь) ва «Манчестер Сити»га (6 ноябрь) қарши ўйинлар кутиб турибди.
«Ливерпуль» Беллингҳемга қизиқиш билдирмоқда
«Ливерпуль» «Боруссия Д» ярим ҳимоячиси Жуд Беллингҳемга қизиқмоқда, деб хабар беради Goal.
Қайд этилишича, Мерсисайд клуби бош мураббийи Юрген Клоппга 18 ёшли футболчининг ўйини маъқул келади ва уни жамоасида кўришни хоҳлайди.
Бироқ дортмундликлар Беллингҳемни 120 миллион евродан камига сотмайди. «Ливерпуль» эса ушбу молиявий талабни бажара олмаслиги мумкин. Жуднинг немис клуби билан амалдаги шартномаси 2025 йилнинг ёзида ўз ниҳоясига етади.
Европа клубларида энг кўп тарбияланувчилари тўп сурадиган жамоалар рейтинги эълон қилинди
CIES Football Observatory халқаро спорт тадқиқотлари маркази тарбияланувчилари Европанинг юқори дивизионларида тўп сураётган клублар ҳақидаги ҳисоботини тақдим этди.
Рейтингга УЕФАга аъзо мамлакатлардан 31 та юқори дивизион клублари киритилган. Ушбу рўйхатда биринчи ўринни «Аякс» эгаллади, ҳозирда Нидерландия клубининг 81 нафар тарбияланувчилари Европа Лигаларида тўп сурмоқда.
Иккинчи ўринни «Шахтёр» (75) эгаллаган бўлса, кучли учликка «Динамо Киев», «Спортинг» ва «Динамо Загреб» (70) якун ясаб берди.
Тўлиқ рўйхат қуйидагича кўриниш олди:
1. «Аякс» – 81 футболчи
2. «Шахтёр» – 75
3-5. «Динамо К» – 70
3-5. «Спортинг» – 70
3-5. «Динамо» Загреб – 70
6. «Партизан» – 69
7. «Реал» – 62
8. «Бенфика» – 60
9. «Спарта» Прага – 58
10. «Барселона» – 57.
Топ-5 лигаларда энг кўп тарбияланувчиси ҳаракат қиладиган жамоалар:
1-2. «Реал» – 42
1-2. «Барселона» – 42
3. «Лион» – 32
4-5. «Ренн» – 30
4-5. «ПСЖ» – 30
6-8. «Сент-Этен» – 25
6-8. «Арсенал» – 25
6-8. «Валенсия» – 25
9-11. «Манчестер Юнайтед» – 23
9-11. «Челси» – 23
9-11. «Монако» – 23.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)