Dunyo va o‘zbek sportiga oid 26-oktabr kunining eng muhim xabarlari dayjesti bilan tanishing.
O‘zbekiston
Belbog‘li kurash bo‘yicha ilk marta Yevropa chempionati o‘tkazildi2021-yilning 7—10-oktabr kunlari belbog‘li kurash bo‘yicha ilk marta Yevropa chempionati o‘tkazildi. Musobaqaga Ukrainaning Lvov shahri mezbonlik qildi.
Yevropa chempionatida 100 nafarga yaqin polvonlar 4 ta vazn toifalarida bellashdi. Musobaqada bosh hakamlik vazifasini xalqaro toifadagi o‘zbekistonlik hakam N.To‘ychiyev bajardi. Hakamlar birinchilikdagi bahslarda belbog‘li kurashda qo‘llaniladigan atamalarni sof o‘zbek tilida talaffuz qilgan.
Shuningdek, Lvov shahrida Ukraina belbog‘li kurashi bo‘yicha ham Jahon chempionati bo‘lib o‘tdi. Ushbu chempionatda O‘zbekiston nomidan 4 nafar sportchi qatnashib, 4 ta medal qo‘lga kiritdi. Yevropa chempionati va ukraincha belbog‘li kurash bo‘yicha jahon chempionati Jahon belbog‘li kurash assotsiatsiyasi prezidenti Azizbek G‘aniyevning ko‘magi ostida o‘tkazilgan.
Hasanboy Do‘stmatov JCh—2021 ni tark etdi
Serbiyaning Belgrad shahrida boks bo‘yicha JCh—2021 bahslarining 2-kunidan o‘rin olgan bahslar o‘tkazilmoqda.
26-oktabr kuni Hasanboy Do‘stmatov 1/8 finalda qozog‘istonlik Saken Bibossinovga mag‘lub bo‘ldi va musobaqani tark etdi. Odiljon Aslonov esa jangsiz keyingi bosqichga yo‘l oldi.
Shuningdek, 26-oktabr kuni Saidjamshid Ja’farov slovakiyalik bokschiga qarshi ringga ko‘tariladi.
Jahon
“Barselona” va “Boka Xuniors” klublari Maradona xotirasiga bag‘ishlangan o‘yinda ishtirok etadi
“Barselona” va “Boka Xuniors” klublari Diyego Maradonaning xotirasiga bag‘ishlab, Ar-Riyodda (Saudiya Arabistoni) o‘yin o‘tkazadi. Bu haqda katalon klubi saytida xabar berildi.
Uchrashuv 14-dekabr kuni bo‘lib o‘tadi. Maradona futbolchilik faoliyati davomida ushbu klublarda faoliyat yuritgan.
APL futbolchilariga koronavirusga qarshi emlanganlik to‘g‘risida soxta sertifikat taklif qilinmoqda
Angliya Premyer Ligasi futbolchilariga koronavirusga qarshi emlanganlik to‘g‘risida soxta hujjatlar taklif qilinmoqda.
Daily Mail xabariga ko‘ra, firibgarlar Premyer Liga o‘yinchilari bilan aloqaga chiqib, ularga 1000 funt sterlingga ikkita soxta sertifikat taklif qilmoqda.
Liganing to‘rt klubi paydo bo‘lgan firibgarlik mavjudligini tasdiqlagan. Liga esa bu haqda hech narsa bilmasligini ma’lum qilgan.
“Manchester Yunayted” Sulsherni iste’foga chiqarmaydi
“Manchester Yunayted” bosh murabbiyi Ole-Gunnar Sulsher iste’foga chiqarilmaydi, deb yozmoqda Sky Sports.
Nashrga ko‘ra, klub norvegiyalik mutaxassisni ishdan bo‘shatish haqida o‘ylamayapti. Fabrisio Romano esa Sulsherni hatto jamoaning sobiq bosh murabbiyi Aleks Fergyuson ham qo‘llab-quvvatlayotgani yozdi.
Avvalroq, “qizillar” Antonio Konte bilan aloqaga chiqqani va uning bu taklifga rozilik bildirib, 3 yillik bitim xohlayotgani haqida xabarlar tarqalgandi.
“Manchester Yunayted”ni oldinda “Tottenhem” (30-oktabr), “Atalanta” (2-noyabr) va “Manchester Siti”ga (6-noyabr) qarshi o‘yinlar kutib turibdi.
“Liverpul” Bellinghemga qiziqish bildirmoqda
“Liverpul” “Borussiya D” yarim himoyachisi Jud Bellinghemga qiziqmoqda, deb xabar beradi Goal.
Qayd etilishicha, Mersisayd klubi bosh murabbiyi Yurgen Kloppga 18 yoshli futbolchining o‘yini ma’qul keladi va uni jamoasida ko‘rishni xohlaydi.
Biroq dortmundliklar Bellinghemni 120 million yevrodan kamiga sotmaydi. “Liverpul” esa ushbu moliyaviy talabni bajara olmasligi mumkin. Judning nemis klubi bilan amaldagi shartnomasi 2025-yilning yozida o‘z nihoyasiga yetadi.
Yevropa klublarida eng ko‘p tarbiyalanuvchilari to‘p suradigan jamoalar reytingi e’lon qilindi
CIES Football Observatory xalqaro sport tadqiqotlari markazi tarbiyalanuvchilari Yevropaning yuqori divizionlarida to‘p surayotgan klublar haqidagi hisobotini taqdim etdi.
Reytingga UEFAga a’zo mamlakatlardan 31 ta yuqori divizion klublari kiritilgan. Ushbu ro‘yxatda birinchi o‘rinni “Ayaks” egalladi, hozirda Niderlandiya klubining 81 nafar tarbiyalanuvchilari Yevropa Ligalarida to‘p surmoqda.
Ikkinchi o‘rinni “Shaxtyor” (75) egallagan bo‘lsa, kuchli uchlikka “Dinamo Kiyev”, “Sporting” va “Dinamo Zagreb” (70) yakun yasab berdi.
To‘liq ro‘yxat quyidagicha ko‘rinish oldi:
1. “Ayaks” – 81 futbolchi
2. “Shaxtyor” – 75
3-5. “Dinamo K” – 70
3-5. “Sporting” – 70
3-5. “Dinamo” Zagreb – 70
6. “Partizan” – 69
7. “Real” – 62
8. “Benfika” – 60
9. “Sparta” Praga – 58
10. “Barselona” – 57.
Top-5 ligalarda eng ko‘p tarbiyalanuvchisi harakat qiladigan jamoalar:
1-2. “Real” – 42
1-2. “Barselona” – 42
3. “Lion” – 32
4-5. “Renn” – 30
4-5. “PSJ” – 30
6-8. “Sent-Etyen” – 25
6-8. “Arsenal” – 25
6-8. “Valensiya” – 25
9-11. “Manchester Yunayted” – 23
9-11. “Chelsi” – 23
9-11. “Monako” – 23.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)