Афғонистондаги ҳарбий-сиёсий инқироз Мустақил Давлатлар Ҳамдўстлиги (МДҲ) мамлакатлари хавфсизлигига жиддий таҳдид солмоқда. Бу ҳақда Тожикистон президенти Эмомали Раҳмон 15 октябрь куни Ҳамдўстлик давлатлари раҳбарлари кенгашининг онлайн йиғилиши чоғида айтиб ўтди.
«Афғонистондаги ҳарбий-сиёсий ва гуманитар инқироз мамлакатларимиз хавфсизлигига жиддий хавф туғдирди», — деди давлат раҳбари.
Унинг таъкидлашича, БМТ Хавфсизлик Кенгаши томонидан террорчилик гуруҳлари рўйхатига киритилган «Толибон» ҳаракатининг қўшни давлатда ҳокимият тепасига келиши Тожикистон учун «вазиятни янада мураккаблаштирди». Шу нуқтаи назардан, Раҳмон Ҳамдўстлик мамлакатларининг хавфсизлик тузилмаларини Афғонистондан келиб чиқаётган таҳдидларга қарши курашда янада яқинроқ жипслаштиришга чақирди.
Эмомали Раҳмоннинг айтишича, Тожикистон МДҲ мамлакатлари ҳудудида фаолияти тақиқланган террорчилик ташкилотларининг ягона рўйхатини тузишда МДҲга аъзо давлатларнинг қўллаб-қувватловига умид қилмоқда.
«Бизни, шунингдек, мамлакатларимизда тақиқланган, ноқонуний ҳаракатларини оқлаш учун халқаро ва минтақавий тузилмалар платформаларидан фойдаланадиган бир қатор ташкилотларнинг фаолияти ҳам ташвишлантирмоқда. Шу муносабат билан, умид қиламизки, Тожикистон томонидан таклиф қилинган... (МДҲга) аъзо мамлакатлар ҳудудида тақиқланган террорчилик ва экстремистик ташкилотларнинг ягона рўйхатини тузиш ғояси биргаликда амалга оширилади», — деди президент.
У, шунингдек, минтақавий хавфсизлик соҳасида Ҳамдўстликнинг устуворлиги терроризм, экстремизмнинг барча кўринишлари — гиёҳванд моддалар, қурол-яроғнинг ноқонуний савдоси, кибержиноятлар ва трансчегаравий уюшган жиноятчиликка қарши курашда акс этишини таъкидлади. Раҳмон МДҲ фаолияти даврида ҳамкорликнинг тегишли механизмлари, биринчи навбатда, аксилтеррорчилик маркази яратилганини ва улар иш олиб бораётганини эслади. «Қабул қилинган ҳужжатлар ижросини давом эттириш ва хавфсизлик соҳасида МДҲнинг меъёрий-ҳуқуқий базасини янада мустаҳкамлаш муҳим аҳамиятга эга», — таъкидлади Тожикистон раҳбари.
Тожикистон президенти, шунингдек, МДҲга аъзо давлатларни биологик хавфсизлик ва иқлим ўзгаришига қарши кураш соҳасидаги ҳамкорликни кучайтиришга чақирди. «Биологик хавфсизлик соҳасида ортиб бораётган хавфлар иқлим ўзгариши муаммоси билан боғлиқ бўлиб, улар соҳадаги ҳамкорлигимизни зудлик билан кучайтириш зарурлигини тақозо этмоқда», — деди давлат раҳбари.
Унинг сўзларига кўра, асосий вазифа — глобал исишнинг салбий оқибатларига, жумладан, музликларнинг эриши хавфига ўз вақтида жавоб бериш учун зарур чораларни кўриш. Унинг таъкидлашича, Тожикистон 2025 йилни Музликларни ҳимоя қилиш йили деб эълон қилиш ташаббуси билан чиққан, шунингдек, музликларни ҳимоя қилиш бўйича махсус халқаро фонд ташкил қилган. «Умид қиламанки, ушбу ташаббуслар ташкилотимизга аъзо давлатлар томонидан фаол қўллаб-қувватланади», — деди президент.
Изоҳ (0)