АҚШнинг Флорида штатидаги Элгин авиабазасидан учирилган F-15E Strike Eagle қирувчи-бомбардимончи самолёти синовдан ўтказилди, у GBU-72 Advanced 5K Penetrator русумли янги бетон бузувчи бомба ёрдамида яқин масофадаги юқори ҳимояланган нишонни йўқ қилди. Бу ҳақда АҚШ Ҳарбий-ҳаво кучларига таяниб The Defense Пост хабар берди.
Оғирлиги 2,3 тонна бўлган авиабомба ўртача чуқурликдаги бетон буюмларни, хусусан, Шимолий Корея ва Эроннинг атом саноати объектлари ва буйруқ марказларида жойлашган бункерларга ўхшаш объектларни ўртача бомбардимончилар ёрдамида йўқ қилишга мўлжалланган.
Авиабомба ер остига 30 метргача киришга ёки 6 метргача қалинликдаги бетонни тешишга қодир.
«5000 фунтлик (2,3 тоннадан ортиқ) бу бомбанинг ташланиши унинг бир қатор синовлари тугаганини англатади», — дейилади хабарда.
Ушбу янгича бошқариладиган авиабомбани яратиш ишлари 2017 йилдан бери давом этмоқда. АҚШ Ҳарбий-ҳаво кучлари уни 2022 йилда сотиб олишни режалаштирган. 125 та бомбадан иборат биринчи партиянинг нархи 36 миллион долларни ташкил қилади, бутун АҚШ ҳарбий-ҳаво кучларига камида 2 мингта шундай бомба келтириш режалаштирилган.
Бу авиабомбалар билан F-15E’дан ташқари, F-16 қирувчи самолётларини, шунингдек, бешинчи авлод F-35 қирувчи самолётларини жиҳозлаш режалаштирилган. Шу билан бирга, бу Американинг ядровий бўлмаган энг катта ва энг кучли авиабомбаси эмас. АҚШ Ҳарбий-ҳаво кучларида оғирлиги 10 тоннагача бўлган Massive Ordnance Air Blast ва оғирлиги 13,6 тонналик Massive Ordnance Penetrator бомбалари мавжуд, уларни фақат оғир стратегик бомбардимончилар олиб юра олади.
Изоҳ (0)