«Пандора архиви»: Гурбангули Бердимуҳамедовнинг жиянлари давлат заводлари маҳсулотларини экспорт қилувчи компанияларнинг яширин эгалари бўлиб чиқди

Туркманистон минерал ўғитлар ва нефть-кимё маҳсулотларининг экспорт-импортида иштирок этадиган компанияларнинг асл эгалари Туркманистон президенти Гурбангули Бердимуҳамедовнинг жиянлари Ҳожимурод ва Шомурод Режеповлар бўлиб чиқди. Бу ҳақда Turkmennews ва Gundogar нашрлари «Пандора архиви» ҳужжатларидан билиб олди. Суриштирувчи-журналистлар халқаро консорсиуми томонидан эълон қилинган мазкур ҳужжатлар дунё сиёсатчиларининг молиявий жиноятларини фош этади.

Қайд этилишича, Ҳожимурод Режепов яширинча Caran компаниясини бошқаради,  «Гарабогазкарбамид» заводида ишлаб чиқариладиган карбамид ўғитлари экспорти ушбу компания орқали ўтади. Завод 2018 йилда Япония халқаро ҳамкорлик банкидан олинган 1,16 миллиард доллар қарз ҳисобига қурилган.

Ҳожимуроднинг укаси Шомурод Режепов худди шу тарзда Delanor компаниясига алоқадор. Компания Туркманистон кимё саноати маҳсулотлари ва Туркманистон нефть-газ соҳасидаги давлат корхоналари томонидан ишлаб чиқарилган нефть маҳсулотларининг сотуви билан шуғулланади.

«Пандора архиви»да эълон қилинган ҳужжатлардан маълум бўлишича, ака-ука Режеповлар Дубайнинг нуфузли туманларида 16 та квартира сотиб олган.

C4АDS суриштирувчи ташкилоти томонидан ОCCRP (Коррупция ва уюшган жиноятчиликни ўрганиш маркази)га тақдим этилган Дубайдаги кўчмас мулк эгалари рўйхатидан маълум бўлишича, Ҳожимурод бешта турар жой мажмуасида тўққизта квартирага, Шомурод еттита квартирага эгалик қилади.

«Очилган файлларда сотиб олинган сана кўрсатилмаган, лекин маълумотнинг базага киритилган вақтига қаралса, мулк 2018 йилдан кейин — Caran ва Delanor’нинг фаоллиги ошган пайтларда сотиб олинган», — дейилади суриштирувда.

Ушбу мажмуаларда сотиладиган квартираларнинг нархидан келиб чиқиб, суриштирувчилар ака-укалар тасарруфидаги кўчмас мулкнинг умумий қийматини 5,5 миллион долларга баҳолади.