Жанубий Африка Республикасининг марҳум президенти Нельсон Манделанинг шахсий буюмлари кимошди савдосига қўйилди. Бу ҳақда Reuters хабар берди.
Нельсон Манделанинг қариндошлари президентнинг шахсий буюмларини сотиб, тушган маблағларни унинг шарафига қурилаётган ёдгорлик боғига йўналтирмоқчи.
Тахминан 100 та буюмдан иборат тўпламда Манделанинг расмий тадбирларда, жумладан, 1998 ва 2003 йилларда Буюк Британия қироличаси Елизавета билан учрашган пайтда кийган машҳур ранг-баранг нақшли мадиба кўйлаклари бор. Ушбу кийимлар сабаб ЖАРда Нельсон Мандела Мадиба номи билан ҳам танилган, бу косалар халқи қабилаларидан бирининг номи.
Нью-Йоркдаги Guernsey’s аукцион уйи раҳбари Арлан Эттингернинг айтишича, кўйлаклар буюк раҳбарга қувонч бағишлар ва уни бошқа сиёсатчилардан ажратиб турарди. Қайд этилишича, ўнта кўйлак Нью-Йорк технология институти мода музейида турли аудиториялар ва талабаларга сабоқ бериш ва уларни илҳомлантириш учун уч ҳафта давомида кўргазмага қўйилади.
АҚШ собиқ президенти Барак Обама ва бошқа давлат раҳбарларининг совғалари ҳамда Манделанинг кўзойнаги, портфеллари ва шимлари ҳам ЖАРнинг Куну шаҳридаги Нельсон Мандела Озодлик боғини молиялаштириш учун сотилмоқда. Мандела ўша ерга дафн этилган.
Нельсон Мандела — Жанубий Африканинг давлат ва сиёсат арбоби. У 1994 йил 10 майдан 1999 йил 14 июнга қадар ЖАР президенти бўлган. 27 йил тутқунликда ўтирган Мандела апартеид даврида инсон ҳуқуқлари учун курашган энг таниқли фаоллардан бири. У 1993 йилда тинчлик бўйича Нобель мукофоти лауреати бўлган.
Изоҳ (0)