Яримўтказгичларнинг глобал танқислиги бутун дунё автомобиль саноатига, шунингдек, UzAuto Motors компаниясига ҳам ўз таъсирини ўтказмоқда. Шу сабаб UzAuto Motors Cobalt автомобилини 1 миллион сўм арзонроқ эвазига тезроқ етказиб бериш таклифини берди. Бунда автомобиль харидорга ўриндиқ иситиш модулисиз етказиб берилади.
«Юзлаб тайёр Chevrolet Cobalt автомобиллари завод автотураргоҳида ўзларининг янги эгаларини кутмоқда. Биргина яримўтказгич деталининг йўқлиги сабаб автомобилдаги ўриндиқни иситиш тизими ишламаслиги автомобилни эгасига топширишга йўл қўймайди.
Юзага келган ҳолатдан келиб чиқиб, UzAuto Motors компанияси яқин орада 4-позиция Chevrolet Cobalt’ни кутаётган мижозларга автомобилни ўриндиқ иситиш модулисиз таклиф этади. Ушбу комплектация 1 миллион сўмни ташкил этади. Уларнинг нархи автомобилнинг умумий нархидан олиб ташланади.
Автомобилда кондиционер ва печка ишлашини таъминловчи иситиш ва совитиш тизим регулятори (HVAC контроллер) ўзгаришсиз ишлайди. Ўриндиқни иситиш тугмаси ишламайди», — дейилади компания мурожаатида.
UzAuto Motors’нинг қўшимча қилишича, харидорнинг розилиги билан амалга оширилувчи ушбу мажбурий чоранинг қўлланилиши узоқ кутилган автомобилларнинг яқин орада ўз эгаларига етказилишини таъминлайди.
Бундан аввал UzAuto Motors яримўтказгичлар танқислиги сабаб Lacetti автомобилларини дон омборида сақлашга мажбур бўлаётгани ҳақида хабар берилганди.
Изоҳ (0)