Самарқанд вилояти Пайариқ туманида Тошкент шаҳридаги тадбиркорларни катта пулга «туширган» шахслар аниқланди, дея хабар бермоқда Бош прокуратура ҳузуридаги Департамент матбуот хизмати.
Бош прокуратура ҳузуридаги Департаментнинг Пайариқ туман бўлими ходимлари томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган.
Унда фуқаро Т.М. ва бошқалар тумандаги «Д.» МЧЖ ҳамда «М.» оилавий корхонасини бошқарган даврида Тошкент шаҳридаги «Д.»ва «П.» МЧЖлар ҳамда «Э.» хусусий корхонасининг 548,5 миллион сўмлик мулкини фирибгарлик йўли билан қўлга киритгани аниқланган.
Бундан ташқари улар фуқаро Ш.нинг ишончига кириб, унинг номига юқоридаги субъектлардан 171 миллион сўмлик мебель жиҳозларини қабул қилиб олгани тўғрисида ҳужжатларни расмийлаштириб, маҳсулотлар сотувидан тушган нақд пул маблағларини банк муассасасига топширмасдан савдо қоидаларини бузгани аниқланган.
Мазкур ҳолат юзасидан Жиноят кодексининг 168-моддаси (фирибгарлик) ва 189-моддаси (савдо ёки хизмат кўрсатиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Тошкент вилоятида 10 минг долларни ноқонуний сотишга уринган шахслар ушлангани, Фарғонада тадбиркорга энергетик ичимлик дилерлигини ваъда қилиб, уни қарийб 270 миллион сўмга чув туширган шахсга жиноят иши қўзғатилгани ҳамда Андижонда ўзини Испания банки вакили дея таништириб, 200 минг доллар кредит олиб бериш учун пул талаб қилган шахс ушлангани ҳақида хабар берилганди.
Изоҳ (0)