Намангандаги 26-меҳрибонлик уйини охирги 5 нафар бола тарк этди. Бу ҳақда «Дарё» мухбири Азизбек Абдувалиев хабар бермоқда.
Болаларни меҳрибонлик уйи директорининг маънавий-маърифий ишлар бўйича директор ўринбосари Феруза Абдураҳмонованинг оиласи ўз бағрига олди. Феруза ва унинг турмуш ўртоғи, Янги Наманган туман ҳокимлиги котибият мудири Зоҳиджон Исмонбоевнинг уч нафар фарзанди — икки қиз ва бир ўғли бор.
— Меҳрибонлик уйига бундан 8 йил аввал, 2013 йилда ишга келганман. Ўшанда 26 ёшда эдим, бошида қийналдим. Кейин-кейин кўникиб, мослашиб кетдим, тажриба орттирдим, болалар билан ишлашни ўргандим. Шу йил февраль ойида давлат раҳбари бизнинг даргоҳга ташриф буюрганларидан кейин муассасамизда жуда катта ўзгаришлар юз берди: мукаммал таъмирланди, янги тизим йўлга қўйилди, Миллий гвардия ўз оталиғига олди. Тарбияланувчиларни яқинлари олиб кетишди, патронатга, оилавий меҳрибонлик уйларига топширилди. Улар болаларимиздек бўлиб қолишгани учун ҳар гал бизни тарк этишаётганида юрагимизни узиб кетгандек бўлишарди. Шу сабабли уларни ўзим ҳам асраб олишни ўйладим. Қароримни турмуш ўртоғим, яқинларимиз қўллаб-қувватлашди. Насиб экан, ўзим шунча йил ишлаган даргоҳдаги охирги 5 нафар бола бизнинг оилага кетяпти, — дейди Феруза Абдураҳмонова.
Меҳрибонлик уйини тарк этаётган 5 боланинг тўрт нафари — Азизбек, Озодбек, Элмурод ва Мухтор 17 ёшда, Лариса эса 18 ёшни қаршилади.
— Бу ерга бундан 10 йил аввал келганман. Дадам ташлаб кетганлар, ойим хорижда меҳнат қиладилар. Аввал меҳрибонлик уйига топширишгани учун ўксиган, ойимдан хафа бўлгандим. Ҳозир эса тўғри қилган эканлар деб ўйлайман. Чунки қишлоққа, уйимизга борганимда тенгдошларим билан ўзимни солиштириб кўраман ва улардан анча илгарилаб кетганимни сезаман. Бу ерда таълим-тарбия олдим, муомалани ўргандим, спортдан — кураш ва жиу-житсу билан шуғулландим. Китоб ўқиш бўйича эса чемпион бўлсам керак: яқинда Стефани Майернинг каттагина китобини икки кунда ўқиб тугатдим. Келажакдан орзуларим катта, ҳуқуқ-тартибот идораларида ишлаш ниятим бор. Ҳужжатларимни Тошкент юридик университети ёки Жамоат хавфсизлиги университетига топширмоқчиман, — дейди меҳрибонлик уйининг эндиликда собиқ тарбияланувчиси Озодбек Насриддинов.
Феруза Абдураҳмонова бу даргоҳдаги тарбияланувчиларнинг дуоларига ихлоси баланд эканлигини яширмайди. Чунки улар ёш бўлишига қарамай ҳаёт қийинчиликлари ва турмуш аччиқ-чучугини тотиган болалар.
— Яширмайман, кеч фарзанд кўрдик. Ўшанда шу болалар мени юпатиб, «ая, ҳеч хафа бўлманг, ҳали эгизак фарзандлар кўрасиз, биз ҳам болаларингизмиз-ку», деб тасалли беришарди, дуо қилишарди. Худойимга айтганимиз ва айтганлари бор экан, бундан 4 йил аввал эгизакларим — Фотима ва Ҳусан дунёга келди, уларнинг ортидан Фахрия туғилди. Энди эса бир пайтлар мени юпатиб юрган болаларни ўзим оиламизга олиб кетяпман. Уларнинг келгусида эл корига ярайдиган инсонлар бўлиб етишишлари учун бор кучимизни сарфлаймиз, — дейди Феруза Абдураҳмонова.
Шу тариқа, Намангандаги 26-меҳрибонлик уйида тарбияланаётган 41 нафар боладан 26 нафари оиласи ва қариндошларига қайтарилди, 15 нафари эса оилавий меҳрибонлик уйларига йўл олди. Бу даргоҳда энди тарбияланувчилар қолмади.
Меҳрибонлик уйи директори Дилором Абдураҳимованинг маълум қилишича, муассасанинг келгусидаги фаолияти юзасидан ҳозирда бир неча вариантлар кўриб чиқилмоқда. Улар орасида тарбияси оғир болалар билан шуғулланувчи марказдан тортиб давлат ихтисослаштирилган мактаб-интернатигагача бор. Ушбу таклифлар жамланиб, вилоят ҳокимлиги, Халқ таълими вазирлиги ва бошқа мутасадди идораларга юборилади.
Намангандаги меҳрибонлик уйининг ишчи-ходимларига 2021 йилнинг октябрь—ноябрь ойлари учун компенсация пуллари тўланиши ва улар келгусида иш билан таъминланиши кўзда тутилган.
Халқ таълими вазирлиги Болаларни ижтимоий ҳимоялаш ва қўллаб-қувватлаш бошқармаси бош мутахассиси Рўзибек Тўраевнинг аниқлик киритишича, агар ота-она боладан воз кечиб, уни болалар уйига топширмоқчи бўлса, бола дастлаб навбатда турган оилаларга тавсия этилади. Агар улар рад этса, яқин ҳудуддаги болалар уйига ёки болалар шаҳарчасига жойлаштирилади.
Оилавий болалар уйида сақланаётган болаларнинг мақоми ва уларни вояга етганда уй-жой билан таъминлаш, олий таълим муассасаларига кириш каби имтиёзлари сақланиб қолади. Агар болани кимдир суд қарори билан асраб олса, ушбу имтиёзлар ўз кучини йўқотади.
Эслатиб ўтамиз, Президент Шавкат Мирзиёев 2021 йил февралида Наманганга ташрифи чоғида вилоятдаги 26-меҳрибонлик уйида бўлиб, бу ерда тарбияланувчилар учун «барча шароитларни муҳайё қилиш» бўйича кўрсатма берганди.
«Сизларни ёруғ кунлар кутяпти. Сизлар олийгоҳларга киришингиз, уй-жойингиз бўлиши, бахтли бўлишингиз учун мен барча саъй-ҳаракатларимизни ишга соламан. Биз қонун асосида давлат ҳимоясида бўлишингиз учун қарорлар қабул қиламиз», — деган эди Шавкат Мирзиёев.
Қайтадан мукаммал таъмирланган муассаса 2021 йил 12 август куни фойдаланишга топширилган, тантанали маросимда муассасага Президент совғаси — Nexia-3 автомобили ҳам тақдим этилганди.
Қайд этиш жоиз, Шавкат Мирзиёевнинг ташрифидан сўнг бир қатор тарбияланувчилар, хусусан, Президент кўтарган қизалоқни онаси олиб кетганди.
Кейинчалик 3 нафар тарбияланувчини Тўрақўрғондаги Нурматовлар оиласи, 5 нафар тарбияланувчини Миллий гвардия подполковниги Баҳодир Қўлдошев оиласи, 5 нафар тарбияланувчини наманганлик журналист Муҳаммадали Қамбаров оиласи ўз бағрига олди.
Маълумот учун, 2004 йилда ташкил топган Намангандаги 26-меҳрибонлик уйида ўтган 17 йил давомида юзлаб болалар тарбияланганди.
Изоҳ (0)