Yarimo‘tkazgichlarning global tanqisligi butun dunyo avtomobil sanoatiga, shuningdek, UzAuto Motors kompaniyasiga ham o‘z ta’sirini o‘tkazmoqda. Shu sabab UzAuto Motors Cobalt avtomobilini 1 million so‘m arzonroq evaziga tezroq yetkazib berish taklifini berdi. Bunda avtomobil xaridorga o‘rindiq isitish modulisiz yetkazib beriladi.
“Yuzlab tayyor Chevrolet Cobalt avtomobillari zavod avtoturargohida o‘zlarining yangi egalarini kutmoqda. Birgina yarimo‘tkazgich detalining yo‘qligi sabab avtomobildagi o‘rindiqni isitish tizimi ishlamasligi avtomobilni egasiga topshirishga yo‘l qo‘ymaydi.
Yuzaga kelgan holatdan kelib chiqib, UzAuto Motors kompaniyasi yaqin orada 4-pozitsiya Chevrolet Cobalt’ni kutayotgan mijozlarga avtomobilni o‘rindiq isitish modulisiz taklif etadi. Ushbu komplektatsiya 1 million so‘mni tashkil etadi. Ularning narxi avtomobilning umumiy narxidan olib tashlanadi.
Avtomobilda konditsioner va pechka ishlashini ta’minlovchi isitish va sovitish tizim regulyatori (HVAC kontroller) o‘zgarishsiz ishlaydi. O‘rindiqni isitish tugmasi ishlamaydi”, — deyiladi kompaniya murojaatida.
UzAuto Motors’ning qo‘shimcha qilishicha, xaridorning roziligi bilan amalga oshiriluvchi ushbu majburiy choraning qo‘llanilishi uzoq kutilgan avtomobillarning yaqin orada o‘z egalariga yetkazilishini ta’minlaydi.
Bundan avval UzAuto Motors yarimo‘tkazgichlar tanqisligi sabab Lacetti avtomobillarini don omborida saqlashga majbur bo‘layotgani haqida xabar berilgandi.
Izoh (0)