UzAuto Motors ijtimoiy tarmoqlarda kompaniyaning avtomobillari uchun tuzilgan shartnomalarda mashinalar narxi o‘zgarsa, qo‘shimcha mablag‘ to‘lash lozimligi to‘g‘risida tarqalgan xabarlarga rasmiy munosabat bildirdi.

Foto: “Daryo” / Madina Nurman

Ijtimoiy tarmoqlarda yangilangan Captiva modeli uchun shartnoma tuzish boshlangandan so‘ng, shartnomadagi avtomobil narxi o‘zgarishi mumkinligi to‘g‘risida keltirilgan band muhokamalarga sabab bo‘ldi. Telegram’dagi “Kurbanoff.net” kanali muallifining yozishicha, kompaniya 2019-yildagi va’dasini unutgan holda, yana shartnomaga yetkazib berilgan avtomobil uchun narxning oshishi mumkinligi to‘g‘risidagi bandni qayta kiritgan.

Eslatib o‘tamiz, 2019-yil noyabr oyi oxirida Monopoliyaga qarshi kurashish qo‘mitasi UzAuto Motors shartnomalaridagi avtomobillar narxi o‘zgargan taqdirda, qo‘shimcha haq to‘lash to‘g‘risidagi band chiqarib tashlanishi haqida xabar bergan edi. Ijtimoiy tarmoqlarda tarqalgan xabarlardan so‘ng, qo‘mita UzAuto Motors shartnomalaridagi qo‘shimcha to‘lovlar to‘g‘risidagi bandni o‘rganishini ma’lum qildi.

Foto: Telegram / “Kurbanoff.net”

UzAuto Motors tomonidan bildirilgan munosabatda ta’kidlanishicha, shartnomada bir tomonlama narxlarni oshirish haqida hech qanday band yo‘q.

Qayd etilishicha, shartnomaning 2.4 bandi hozirgidek kabi ilgari ham bo‘lgan. Ushbu bandda keltiriladiki, qo‘shimcha to‘lov faqatgina avtomobil komplektatsiyasi o‘zgargandagina amalga oshiriladi.

“Bundan ko‘rinib turibdiki, xabar mualliflari ushbu band, shuningdek, shartnomaning navbatdagi bandlari bilan to‘liq tanishishmagan. 2.4.1 va 2.4.3 bandlariga ko‘ra, agar komplektatsiya e’lon qilingandan farq qilsa, xaridor to‘lovni qaytarish sharti bilan avtomobil xarididan voz kechishi yoki uni almashtirish huquqiga ega”, — deyiladi munosabatda.

Ma’lum qilinishicha, 2.4-band avtomobil komplektatsiyasi o‘zgarishi mumkin bo‘lgan vaziyatlarda mijoz uchun bir nechta takliflarni taqdim etadi. Ushbu shartnomada xaridor huquqlari himoyalangan va agar mijoz qo‘shimcha to‘lov qilishni xohlamasa, unda har doim tanlov huquqi bor: u xarid qilishdan voz kechib, pulni qaytarib olish yoki avtomobilni mos keladigan modifikatsiyaga almashtirishni talab qilish huquqiga ega.

Shuningdek, UzAuto Motors shartnomaga muvofiq keltirilgan komponentlarga ko‘ra avtomobil narxi oshmasligini eslatib o‘tgan.

Avvalroq MIB UzAuto Motors’dan davlat foydasiga 257 million so‘m boj undirgani haqida xabar berilgan edi.