RT нашри салонида россиялик телебошловчи Ксения Собчак бўлган Mercedes’нинг Volkswagen автомобили билан тўқнашуви акс этган видеолавҳаларни эълон қилди. ЙТҲ йўлда ўрнатилган кузатув камералари томонидан, шунингдек, ҳодисадан сал олдин Mercedes қувиб ўтган микроавтобуснинг видеокузатув тизими орқали тасвирга олинган.
Ксения Собчак йўловчи сифатида ўтирган Mercedes S500 ҳайдовчиси қувиб ўтиш чоғида йўлнинг қарама-қарши йўналишдаги қисмига ўтиб кетган ва Volkswagen автомобили билан тўқнашган. Шундан кейин у отилиб кетиб, микроавтобусга тегиб кетган. Автобус йўловчиларидан ҳеч ким жабрланмаган, фақат бир нечта ойна синган.
ЙТҲ 9 октябрь куни кечқурун Адлер — «Альпика Сервис» йўлида содир бўлган. Ҳодиса оқибатида Volkswagen йўловчиси ҳалок бўлган. Mercedes ҳайдовчиси бахтсиз ҳодисада айбдорлигини тан олди, у уй қамоғига жойлаштирилди.
Воқеа содир бўлганидан кейин Собчак бошқа машинага ўтириб, аэропортга йўл олган. «Подъём» нашри хабар қилишича, Mercedes автомобили Собчакка тегишли бўлмаган, хизмат сафарлари чоғида у доим машиналарни маҳаллий ҳайдовчи билан бирга ижарага олади.
Ксения Собчак ўз Telegram каналига ЙТҲ ҳақида пост жойлади. Телебошловчининг сўзларига кўра, машинадаги ҳеч ким ҳайдовчини тез юришга мажбур қилмаган. Собчакнинг ўзи тўқнашувдан кейин ҳушини йўқотган, мияси чайқалган ва кўп сонли шикастланишлар олган, шу жумладан, ички аъзолари жабрланган. Аммо у «ўғлининг ёнига ва уйига шошгани» сабабли касалхонага боришдан бош тортган.
Собчак — телебошловчи ва сиёсатчи, 2018 йилда у Россия президенти сайловида қатнашиб, 1,68 фоиз овоз билан тўртинчи ўринни эгаллаган. 2019 йилдан буён «Эҳтиёт бўлинг, Собчак!» YouTube каналини юритиб, янгиликлар шарҳлари ва таниқли шахслар билан интервьюларни жойлаб боради.
Изоҳ (0)