Норвегияда камон ва найза билан қуролланган эркак ўткинчиларга ҳужум қилди. Беш киши ҳалок бўлди, уч киши яраланди

Норвегия жанубидаги Конгсберг шаҳри марказида камон ва найзалар билан қуролланган эркак одамларга ҳужум қилди. Бу ҳақда Норвегиянинг NRK телерадиокомпанияси полицияга таяниб хабар берди.

Ҳужумчи шаҳар маркази бўйлаб юрган ҳамда бир неча кишини ўлдиришга ва яралашга улгурган.

Полиция хабарига кўра, ҳужум оқибатида беш киши ҳалок бўлган, яна уч киши, жумладан, бир полициячи жароҳатланган. Ҳужум ҳақида расмийларга биринчи хабар келиб тушганидан, тахминан, ярим соат ўтгач, гумонланувчи қўлга олинган. Ҳибсга олиш пайтида у қаршилик кўрсатгани сабабли полиция огоҳлантирувчи ўқ узишга мажбур бўлган.

Маҳаллий Aftenposten газетаси полиция ва ўз манбаларига таяниб хабар беришича, ҳужумчи 37 ёшли Дания фуқароси бўлиб чиқди.

«Айбланувчи 37 ёшли Дания фуқароси, у Конгсбергда яшайди», — дейилади полиция хабарида. Шу билан бирга, нашр манбалари бу одам илгари исломни қабул қилганини айтган.

Эркак нима сабабдан одамларга ҳужум қилгани номаълум. Полиция уни ёлғиз ҳаракатланган деб ҳисобламоқда. Шунингдек, идора теракт версиясини текширмоқда.

Ҳужум уюштирилган жойга яқин уйда яшовчи аёлнинг гувоҳлик беришича, у аёл кишининг қичқириқларини эшитган. Ҳозир жиноят содир этилган ҳудуд қуршаб олинган. У ерга кўплаб полициячилар ва бир нечта вертолётлар келган.

Конгсбергдаги ҳужум туфайли бутун Норвегия полициячиларига қуролланиш буюрилди (улар одатда қурол олиб юрмайди). Норвегия бош вазири Эрна Сульберг шошилинч матбуот анжумани ўтказди, у бўлиб ўтган воқеани «даҳшатли» деб атади.

25 июнь куни Германияда номаълум шахс ўткинчиларга пичоқ билан ҳужум қилганди. Ҳодиса оқибатида уч киши ҳалок бўлган, камида олти киши жароҳатланган.

Аввалроқ Хитойда номаълум шахс пичоқ билан болалар боғчасига ҳужум қилиб, 16 нафар бола ва 2 тарбиячини яралаган эди. Шунингдек, Грузияда қуролланган шахс банкка бостириб кириб, одамларни гаровга олгани ҳақида хабар берилган.

2 апрель куни эса АҚШ Конгресси биноси яқинидаги назорат пунктига автомобиль келиб урилганди. Ҳайдовчи машинадан сакраб тушиб, пичоқ билан икки полициячига ҳужум қилган, оқибатда полициячилардан бири ҳалок бўлган.