Дунё ва ўзбек спортига оид 4 октябрь кунининг энг муҳим хабарлари дайжести билан танишинг.
Ўзбекистон
Муроджон Аҳмадалиевнинг ҳимоя жанги санаси маълум бўлди
Профессионал бокс бўйича иккинчи ярим енгил вазн (-55,34 кг) тоифасида WBA ва IBF камарлари соҳиби Муроджон Аҳмадалиевнинг (9-0, 7 КО) америкалик Ронни Риосга (33-3, 16 КО) қарши ҳимоя жангининг санаси маълум бўлди. Бу ҳақда таниқли бокс журналисти Майк Коппинжерга таяниб «Оламспорт» хабар берди.
Қайд этилишича, жанг 19 ноябрь куни АҚШда бўлиб ўтади. Кечанинг марказий жангида ўрта вазн тоифасидаги Жейсон Куингли WBO чемпиони Деметриус Андрадега қарши рингга кўтарилади.
Эслатиб ўтамиз, Муроджон Аҳмадалиев сўнгги жангида япониялик Риёсуке Ивасага қарши рингга чиқиб, чемпионлик камарларини ҳимоя қилганди.
Жаҳон
Ҳоланд октябрь ойидаги ФИФА кунларида Норвегияга ёрдам бера олмайди
«Боруссия Д» ҳужумчиси Эрлинг Ҳоланд Норвегия терма жамоасининг октябрь ойида бўлиб ўтадиган ўйинларини ўтказиб юборади, деб хабар берди Kicker.
21 ёшли форвард бўлажак ўйинларда жароҳати туфайли қатнаша олмаслигини маълум қилган. Қайд этиш керак, у жароҳати сабабли «Боруссия Д»нинг ҳам сўнгги 3 та ўйинини ўтказиб юборди.
Норвегия терма жамоаси ЖЧ—2022 саралаши доирасида 8 октябрь куни Туркия билан баҳс юритса, 11 октябрда Черногорияга қарши майдонга тушади.
Миллатлар Лигаси ярим финалига ҳакамлар тайинланди
Италия ва Испания ўртасидаги Миллатлар Лигаси ярим финалига ҳакамлар тайинланди. УЕФА расмий сайтининг маълум қилишича, учрашувни Сергей Карасев бошчилигидаги россиялик ҳакамлар гуруҳи бошқариб боради. Ён чизиқларда унга Игорь Демешко ва Максим Гаврилин ёрдам беради. Тўртинчи ҳакам сифатида эса Сергей Иванов фаолият юритади.
Италия — Испания учрашуви 6 октябрь куни «Сан-Сиро» стадионида бўлиб ўтади. Беллашув Тошкент вақти билан соат 21:45 да бошланади.
17 йил аввалги натижасини такрорлаган «Милан»
«Милан» А Сериянинг 2021/22 йилги мавсумида 7-турдан кейин 19 очко жамғаришга муваффақ бўлди ва 2003/04 йилги биринчиликдаги натижасини такрорлади. Эътиборлиси, ўша мавсумда жамоа чемпионликни қўлга киритганди.
Жамоа ҳозирда мусобақа жадвалида 2-ўринни эгаллаб турибди.
Мавсум бошидан бери мағлубият нималигини билмаётган «Наполи»
«Наполи» 2021/22 йилги мавсум бошидан бери кучли бешлик чемпионатларида очко йўқотмаган ягона клуб бўлиб турибди.
Лучано Спалетти бошчилигидаги неаполликлар А Сериянинг 7-туридан кейин 21 очко билан мусобақа жадвалида биринчи ўринда бормоқда.
Куманга муддат белгилаган «Барселона»
«Барселона» бош мураббийи Рональд Куманнинг жамоадаги келажаги ҳақидаги қарор 24 октябрь санасидан кейин қабул қилиниши мумкин, деб ёзмоқда Marca.
Нашрга кўра, клуб президенти Хоан Лапорта қисқа вақт мобайнида нидерландиялик мутахассисга муносиб ўринбосар топиш мушкул бўлгани учун уни ишдан бўшатмаган. Бундан ташқари, молиявий чекловлар бунда муҳим роль ўйнагани айтилмоқда.
Қайд этилишича, раҳбарият мураббийнинг ишига 24 октябрдан кейин баҳо беради. «Барселона» бунгача «Валенсия» (17 октябрь), «Динамо Киев» (20 октябрь) ва «Реал» (24 октябрь) жамоаларига қарши ўйин ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)