Бутун дунё бўйлаб фойдаланувчилар Facebook ижтимоий тармоғи, WhatsApp мессенжери ва Instagram ижтимоий тармоғи (ҳар иккиси ҳам Facebook’га тегишли) ишламай қолганидан шикоят қилди. Буни машҳур интернет-ресурслар фаолиятини кузатиб борувчи Downdetector портали тасдиқлади, дея хабар бермоқда «Gazeta.uz».
Асосий шикоятлар ушбу ижтимоий тармоқларнинг веб-сайтлари ва иловалари, шунингдек, серверларга уланиши билан боғлиқ. WhatsApp фойдаланувчилари ҳам хабар юборишнинг имкони бўлмаётганидан шикоят қилмоқда, деб ёзади «РБК».
Носозлик ҳақида шикоят қилганлар орасида Россия, АҚШ, Буюк Британия, Канада, Нидерландия, Германия, Италия, Франция, Ўзбекистон ва бошқа давлатлар аҳолиси бор.
Носозлик сабаблари ҳозирча аниқ эмас. «Meduza»нинг хабар қилишича, компаниялар муаммо устида ишлаётганини маълум қилган.
Бундан ташқари, Facebook, Instagram ва WhatsApp’нинг ишламай қолиши туфайли фойдаланувчилар оммавий равишда бошқа ижтимоий тармоқлар ва мессенжерларга ўтишни бошлади. Бу бошқа йирик хизматлар, жумладан, Twitter, Telegram ва YouTube ишлашининг секинлашишига олиб келди.
Изоҳ (0)