Меркель истеъфосидан аввал Германия халқига мурожаат қилиб, демократияни асрашга чақирди

Германия канцлери Ангела Меркель мамлакат фуқароларини демократик асосларни сақлашга чақирди. Бу ҳақда Deutsche Welle хабар берди.

Германия бирлиги кунидаги тантанали маросимда сўнгги марта нутқ сўзлаган Меркель Германияни бирлаштириш жараёни ҳали якунига етмаганини таъкидлади.

«1990 йил 3 октябрь — мамлакатимиз тинчлик ва озодлик учун қайта бирлашган куни. Бу эркинлик бизга осмондан тушмади. У қўлга киритилди. Бугун бу байрамни нишонлаётган мамлакат шунга сазовор бўлди, чунки ГДРда ўзининг, шунингдек, бошқа жамиятнинг ҳуқуқлари, эркинлиги учун ҳамма нарсасини тиккан одамлар бор эди», — деди Меркель.

Унинг сўзларига кўра, Германияда демократик ютуқларга гоҳида юзаки муносабатда бўлишади. Канцлер, шунингдек, ҳозирги жамиятда радикал ҳис-туйғулар намоён бўлаётганини таъкидлаб, халқни демократияни ёмон кўрганлардан уни ҳимоя қилишга чақирди.

«Янги одамлар билан танишишга тайёр туринг, бошқаларда қизиқиш уйғотинг, ўз тарихингизни айтиб беринг ва бошқача фикрлайдиганларга тоқатли бўлинг. Бу 31 йиллик немис бирлигидан олинган сабоқ», — дея қўшимча қилди у.

27 сентябрь куни бўлиб ўтган Германиядаги парламент сайловларида амалдаги молия вазири Олаф Шольц раҳбарлигидаги Социал-демократик партия (ГСДП) ғалаба қозонди. Унга сайловчиларнинг 25,7 фоизи овоз берди, ушбу натижага мувофиқ у янги Бундестагда 206 та ўринга эга бўлади.

Сайлов якунларига кўра, Ангела Меркель канцлер лавозимини тарк этади. У ҳукумат раҳбарлигини ўз ихтиёри билан топширишга ва сайловларда қатнашмасликка қарор қилганди.