«Пандора архиви» эълон қилинди. Унда дунё сиёсатчиларининг молиявий жиноятларга алоқадорлиги фош этилган. Асосий маълумотлар

2021 йил 3 октябрь куни Суриштирувчи-журналистлар халқаро консорсиумининг (ICIJ) «Пандора архиви» (The Pandora Papers) ҳужжатлар тўплами эълон қилинди. Бу 117 та мамлакатда 150 дан зиёд ОАВда фаолият олиб бораётган 600 нафардан кўп журналистнинг суриштирувлари натижаси. Тўпламга 14 та офшор регистраторларининг ички архиви киритилган. Россиядан «Важниe истории» журналистлари мазкур архивни тайёрлашда иштирок этган. Meduza «Пандора архиви» ҳақидаги асосий маълумотларни тақдим этган.

«Пандора архиви»дан жами 12 миллион ҳужжат ўрин олган ва маълумотларнинг умумий ҳажми уч терабайт. Ҳажм жиҳатдан ушбу архив аввалги сиздирилган ахборотлар, жумладан, фақат битта офшор регистраторининг ҳужжатлари жамланган «Панама архиви»дан ҳам катта.

Россияликлардан ушбу архивда Владимир Путиннинг ўртоғи ва президентнинг учинчи қизини дунёга келтиргани тахмин қилинадиган Светлана Кривоногих эслаб ўтилган. Шунингдек, «Первий канал» бош директори Константин Эрнст, «Ростех» оиласи раҳбари Сергей Чемезов, Президент администрацияси раҳбари Антон Вайно ҳамда Россия ташқи ишлар вазири Сергей Лавровнинг куёви Александр Винокуровга алоқадор маълумотлар ҳам ушбу архивда мавжуд. Журналистлар Винокуровнинг бир нечта Виржиня офшорларидаги иштирок этгани ва Исроил фуқаролигига эга эканлигини аниқлаган.

«Важниe истории» вакиллари Константин Эрнстнинг Британиянинг Виржин оролларидаги офшорлар – улар орқали Собиқ иттифоқ даврида қурилган кинотеатрларни бузиб, янги савдо марказлари қурилганига алоқадорлигини таъкидлаган. Ушбу лойиҳага Россия давлат банклари маблағ ажратган. Сергей Чемезовнинг 34 ёшли ўгай қизи Екатерина Игнатова ҳамда унинг бувиси, «Ростех» раҳбарининг қайнонаси Людмила Рукавишниковада ҳам активлар борлиги аниқланган: улар Испанияда 22 миллиард рубллик ҳашаматли яхта ва виллага Виржиния офшорлари орқали эгалик қилади. Светлана Кривоногихнинг эса Монакода 3,6 миллион евролик квартираси бор.

Архивда дунёнинг бошқа машҳур сиёсатчилари ҳам учрайди. Масалан, Покистон бош вазири Имрон Хон, Чехия ҳукумати раҳбари Андрей Бабиш, Иордания қироли Абдулла II, Озарбайжон президенти Илҳом Алиевнинг оиласи ва Украина президенти Владимир Зеленский шулар жумласидан.

Архивда қайд этилган бир нечта сиёсатчи, хусусан, Бабиш ва Зеленский — сайловолди дастурида коррупция ва мамлакатдаги элита қатламининг ноқонуний йўллар билан бойишига қарши курашишини эълон қилганди. Журналистлар айни вақтда сайловолди кампаниясида иштирок этаётган Бабишда (Чехияда парламент сайловлари 8–9 октябрь кунлари ўтказилади) 2009 йилда Францияда офшор орқали 22 миллион долларга харид қилинган кўчмас мулк объектини топишган. Зеленский ва унинг «Квартал 95» продакшн-компаниясидаги ҳамкорларида Британиянинг Виржин ороллари, Кипр ва Белизда офшор тармоқ компаниялари борлиги фош қилинган. 2019 йилдаги сайловлар олдидан Зеленский офшорлардаги улушини Сергей Шефирга сотган ва у айни пайтда президентнинг биринчи ёрдамчиси ҳисобланади. Аммо журналистлар Зеленскийнинг офшорлар орқали ҳанузгача фойда олаётганлигини таъкидламоқда.

Сербия президенти Александр Вучичнинг яқин дўсти ва Белград собиқ мэри Синиша Мали 2015 йилда Қора денгиз бўйида жойлашган ҳашамдор турар жой комплексидаги 24 та квартира унга тегишли эмаслигини қайд этганди. Шунингдек, у журналистлар уйлар ҳақиқатдан ҳам унга тегишли эканлигини исботлашса, уларга квартиралар калитларини беришга тайёрлигини билдирган. Орадан олти йил ўтди ва энди Синиша Мали бу ишни бемалол амалга ошириши мумкин.

Дунёнинг етакчи сиёсатчи ва амалдорларидан ташқари «Пандора архиви»да ҳукуматга, сиёсатга алоқадор бўлмаган таниқли шахсларнинг исм-шарифлари ҳам учрайди. Масалан, «Манчестер Сити» бош мураббийи Хосеп Гвардиола. У ўз маошини Андорра банкида сақлаш орқали Испанияга солиқлар тўламаган. Хонанда Шакира (у юристи орқали жиноят олами ёки солиқлардан қочиш схемаларига алоқадор эмаслиги ҳақида баёнот берган) ва супермодель Клаудия Шифферга алоқадор молиявий ахборотлар ҳам архивдан ўрин олган.