АҚШнинг Калифорния штатидаги Хантингтон-Бич соҳилларида катта миқдордаги нефть Тинч океанига тўкилди. Нефть қувуридан, тахминан, уч минг баррель (тахминан, 477 минг литр) нефть океанга чиқиб кетган.
Қайд этилишича, ҳодиса қирғоқдан 7,2 километр нарида содир бўлган. Тахминан, 34 квадрат километр майдонни нефть қоплаган.
Штат жанубидаги Оринж округида жойлашган Хантингтон-Бич шаҳри мэри Ким Каррнинг сўзларига кўра, нефть тўкилиши экологик фалокат билан баробар.
Нефть тўкилгани ҳақидаги хабар АҚШ Соҳил хавфсизлик хизматига 2 октябрь куни маҳаллий вақт билан эрталаб соат 9 да келиб тушган. 3 октябрь куни эрталабгача нефть қирғоққа етиб келган. У Талберт ботқоғи ва Санта Ана дарёсигача чўзилган.
Нефтнинг Болсам-Чика экологик қўриқхонаси ҳамда Хантингтон-Бич ботқоқликларига етиб боришига йўл қўймаслик учун нефть йиғиш ускуналари жойлаштирилган. 3 октябрь ҳолатига кўра, Соҳил хавфсизлик хизмати сувдан 3150 галлон (тахминан, 12000 литр) нефтни тортиб олган ва 1,6 километр майдон ўраб олинган.
ОАВ маълумотларига кўра, ҳодиса натижасида балиқлар ва бошқа денгиз ҳаётининг нобуд бўлиши ҳолатлари кузатилган, нефтга илашиб қолган қушлар жиддий зарар кўрган.
Мавзуга доир:
- Қора денгизга нефть оқиб кетди. Унинг майдони дастлаб маълум қилинганидан 400 минг марта каттароқ бўлиши мумкин
- Нефтга боғлиқ тарихдаги энг йирик фалокатлар. Улар орасидан Мингбулоқ нефть кони ҳам ўрин олган (фото)
- Канаданинг Keystone қувуридаги авария оқибатида 800 минг тоннага яқин нефть оқиб кетди
Изоҳ (0)