Britaniya hukumati yonilg‘i inqirozini hal qilish bo‘yicha harakatlar doirasida armiyani yuqori shay holatga keltirdi. Bu haqda Biznes, energetika va sanoat vazirligi matbuot xizmati xabariga tayanib, “RBK” xabar berdi.
Foto: Reuters
“Britaniya sisternali avtomobillar harbiy haydovchilari yonilg‘ini kerakli joyga yetkazib berish va yonilg‘i zaxiralari yuqori darajada qolishini qo‘shimcha kafolatlash uchun safarbar qilinadi”, — deyiladi xabarda.
Qayd etilishicha, endilikda harbiy haydovchilar xizmat safariga yuborilishidan oldin maxsus tayyorgarlikdan o‘tadi, bu esa ularga “ta’minot zanjiridagi qiyin vaziyatlar”ni yengishga imkon beradi.
Shuningdek, xabarda Qirollik mudofaa vaziri Ben Uollesning so‘zlari keltirilgan: “Bizning Qurolli kuchlarimiz tarkibidagi erkak va ayollar transport bosimi eng ko‘p seziladigan joyda uni kamaytirish uchun yordamga tayyor. Shuning uchun men harbiylarning yuqori shayligiga ruxsat berdim”, — deb tushuntirgan u.
Iyul oyi oxirida Britaniya avtotashuvchilar assotsiatsiyasi mamlakatda 100 ming yuk mashina haydovchisi yetishmayotgani haqida ogohlantirgandi. Bunga sabab haydovchilarning ko‘pchiligi Brexit’dan keyin Buyuk Britaniyani tark etgan, minglab yangi haydovchilar esa COVID-19 pandemiyasi paytida lokdaun tufayli murakkablashgan haydovchilik guvohnomasi testini kutgan. Natijada mamlakatda bir necha oy davomida yonilg‘i yetkazib berishda uzilishlar kuzatilmoqda, bu esa do‘konlarga oziq-ovqat yetkazib berishga ta’sir qiladi.
Shuningdek, neft kompaniyalari ba’zi yonilg‘i quyish shoxobchalarini yopishga majbur bo‘ldi. Ushbu fonda britaniyaliklar hukumatning yonilg‘i yetkazib berishda muammo yo‘qligi haqidagi bayonotlariga qaramay, vahima ichida benzin sotib ola boshladi. Britaniyaning 11 yirik yonilg‘i kompaniyalari, jumladan, Shell, BP va Exxon Mobil qo‘shma bayonotida yaqin kunlarda Qirollikda yonilg‘iga talab normal darajaga qaytishini va’da qilgan.
25-sentabr kuni Buyuk Britaniya hukumati mamlakatda ishchi kuchi tanqisligi muammosini hal qilish bo‘yicha chora-tadbirlar paketini qabul qildi, bular, jumladan, yuk mashinalari haydovchilari uchun 5 mingta qisqa muddatli viza berishni nazarda tutadi. Biznes, energetika va sanoat vazirligining ma’lum qilishicha, yuk mashinalari haydovchilari litsenziyalari muddatini uzaytirish uchun qayta imtihon topshirishdan vaqtincha ozod qilinadi, chunki bu jarayon ham uch kun vaqt oladi. 27-sentabrdan 31-dekabrgacha bo‘lgan vaqt oralig‘ida tugaydigan haydovchilik guvohnomalarining muddati 2022-yilning 31-yanvarigacha uzaytiriladi.
