«Толибон» томонидан шакллантирилган Афғонистон ҳукумати раҳбари ўринбосари вазифасини бажарувчи Абдулғани Бародар Тожикистон мамлакатнинг ички ишларига аралашаётганини айтди, деб ёзади «РИА Новости».

«Толибон» разведкаси махсус топшириқли бўлинмаси аъзолари Кобулдаги ҳарбий аэродромни қўриқламоқда

Фото: Reuters

«Тожикистон бизнинг ишларимизга аралашмоқда, ҳар бир ҳаракатга қарши ҳаракат бор», — деди у Al-Jazeera телеканалига берган интервьюсида.

Эслатиб ўтамиз, Тожикистон президенти Эмомали Раҳмон Бирлашган Миллатлар Ташкилоти (БМТ) Бош ассамблеясининг 76-сессияси иштирокчиларига йўллаган видеомурожаатида Афғонистоннинг инклюзив ҳукуматини, жумладан, афғонистонлик тожикларнинг иштироки билан тузишга чақирганди.

Эмомали Раҳмон Тожикистоннинг Афғонистон ички ишларига аралашмаслигини айтиб, «бу мамлакатда ҳукумат тузилишини референдум орқали, шунингдек, мамлакатнинг барча фуқаролари позициясини ҳисобга олган ҳолда аниқлашни» таклиф қилди.

Тожикистон президенти аввал ҳам Афғонистонда ушбу мамлакатдаги тожиклар жамоатчилиги иштирокида инклюзив ҳукумат тузишни таклиф қилганди.

7 сентябрь куни «Толибон» ҳаракати Афғонистон ҳукуматининг янги таркибини эълон қилганди. Муҳаммад Ҳасан Оҳунд «Толибон» тузган янги ҳукуматнинг раҳбари бўлди. Мулла Абдул Ғани Бародар бош вазир ўринбосари бўлди. «Ҳаққоний тармоғи» гуруҳи асосчисининг ўғли Сирожиддин Ҳаққоний эса ички ишлар вазири лавозимини эгаллади. «Толибон» асосчиларидан бирининг ўғли Умар Ёқуб мудофаа вазири бўлди.

Европа Иттифоқи Афғонистон муваққат ҳукумати таркибидан хавотир билдирди. Иттифоқ фикрича, «Толибон» инклюзив ҳукумат тузиш ҳақидаги ваъдасини бажара олмаган.