Бугун,

  • USD 10920.28
  • RUB 177.49
  • EUR 11052.42

Жонс Ҳопкинс университети маълумотларига кўра, дунёда коронавирусга чалинганлар сони 229 564 046 кишини ташкил қилмоқда, шуларнинг 4 709 294 нафари вафот этган. Шунингдек, айни пайтгача жаҳонда 5,972 миллиард доза вакцина қўлланилган.

Касалланганлар сони бўйича АҚШ (42,4 миллион), Ҳиндистон (33,5 миллион), Бразилия (21,2 миллион), Буюк Британия (7,5 миллион) ва Россия (7,2 миллион) энг олдинда бормоқда.

Қозоғистон
Фото: Tengrinews

Қаерда қанча аҳоли эмланди?

Ўзбекистонда 21 сентябрь ҳолатига жами 18 755 587 доза вакцинадан фойдаланилган бўлиб, улардан 1-босқичда эмланганлар 10 591 499 нафарни, 2-босқичда эмланганлар 6 013 291 нафарни, 3-босқичда эмланганлар 2 150 797 нафарни ташкил қилди. Шу кунгача тўлиқ эмланган фуқаролар эса 3 842 737 нафарни ташкил қилмоқда.

Тожикистонда 20 сентябрь ҳолатига вояга етган (18 ёш ва ундан катта) аҳолининг қарийб 40 фоизи COVID-19 га қарши вакцина олди. Соғлиқни сақлаш вазирлиги маълумотларига кўра, жами 2 307 140 киши ёки 39,6 фоиз аҳоли эмланган. Вакцинанинг иккинчи дозасини 1 565 281 киши олган. Душанбе шаҳрида катталарнинг 99,6 фоизи эмланган.

Душанбеда 18 ёшдан катта фуқароларни эмлаш 25 июнда бошланган. Аҳолини эмлашда CoronaVac (Хитой), AstraZeneca (Европа), Moderna, Pfizer (АҚШ) ва Спутник V (Россия) вакциналари қўлланилмоқда.

Қозоғистонда эса коронавирусга қарши эмланганлар сони 7,334 миллиондан ошди. ССВ маълумотларига кўра, мамлакатда маҳаллий QazVac вакцинасидан ташқари, «Спутник V», Ҳаят Вах, CoronaVac ва Sinopharm вакциналари ҳам қўлланилмоқда.

Қозоғистонда аҳолини эмлаш 2021 йил 1 февраль куни бошланган эди.

Айни пайтгача жами 19 миллионлик аҳолининг 7,334 миллиони битта, 6,201 миллиони иккита дозада эмланган.

Қозоғистонда коронавируснинг янги эта штамми аниқланди

Қозоғистонда коронавируснинг «нигерияча» эта штамми аниқланди, у мамлакатнинг тўртта ҳудудида айланиб юрибди, дея хабар берди мамлакат соғлиқни сақлаш вазири Алексей Сой.

ССВ жорий йилнинг июль августида COVID-19 билан касалланганлардан олинган мусбат лаборатория намуналарини секвенлаш усули билан коронавирус инфекциясини генетик тадқиқ қилди. 96 та намунани таҳлил қилиш натижасида Қозоғистонда дельта («ҳиндча» — намуналарнинг 59,4 фоизи), алфа («британча» — 25 фоиз), «уханча» (10,4 фоиз) ва эта («нигерияча» — 5,2 фоиз) штаммлари айланиб юргани аниқланди. «Нигерияча» штамм тўртта ҳудудда — Қарағанда, Манғистов ва Павлодар вилоятларида ҳамда Нур-Султонда топилган.

Эта штамми пайдо бўлгани ҳақида 2020 йил декабрида маълум бўлган, илк касалланиш ҳолатлари Нигерия ва Буюк Британияда қайд этилган эди. ЖССТ маълумотларига кўра, 15 сентябрь ҳолатига дунёнинг 77 та мамлакатида Эта штамм аниқланган. ЖССТ ушбу мутацияни «кузатиш» талаб этиладиган вариантлар қаторига қўшади.

Унинг клиник белгилари алфа («британча») ва бета («жанубий африкача») штаммларники билан бир хил бўлиб, булар — юқори ҳарорат, йўтал, ҳид ва таъм билиш қобилиятининг йўқолиши, касалликнинг анча оғир кечиши ва бошқалардир.

Инфекциядан ҳимояланиш ва касалхонага ётқизилишнинг олдини олиш учун ССВ фуқароларни эмланишга чақирди. Шунингдек, касалланиш хавфини камайтириш учун эҳтиёт чораларига риоя қилиб, ниқоб режими, ижтимоий масофа ва қўл гигиенаси ҳақида унутмасликка даъват этди.

Қозоғистонда тўй, зиёфат ва юбилейларни ўтказишга рухсат берилди

Қозоғистонда 27 сентябрдан тантанали ва оилавий маросимлар, маъракалар, зиёфатлар, тўйлар, юбилейлар ўтказишга рухсат берилди. Фақат уларнинг иштирокчилари Ashyq дастурида «хавфсиз» статусига эга бўлиши керак.

Шунингдек, республикада одамларни оммавий тўплаб конференциялар, форумлар, томоша ва бошқа тадбирлар, кўргазмалар, очиқ ҳавода марафонлар, томошабинлар иштирокида спорт тадбирларини ўтказишга, спорт мажмуалари, диний объектлар ва ўйин клублари фаолиятига рухсат берилди.

Соғлиқни сақлаш вазири Алексей Сойнинг сўзларига кўра, мамлакатда эпидемиологик вазият барқарорлашмоқда, сўнгги 2 ҳафта Ичида касалланиш ва ўлим даражаси 60 фоизга пасайган.

Туркманистон 2020 йилда коронавирусга қарши курашга 46 миллион доллар сарфлади

БМТ ва ривожланиш бўйича шериклар Туркманистонга шайлик ва жавоб қайтариш миллий режаси доирасидаги тадбирлар учун 2,5 миллион доллар ажратган. Бу ҳақда БМТнинг 17 сентябрда эълон қилинган «Барқарор ривожланиш мақсадларига эришиш учун умумий интилиш» ҳисоботида айтиб ўтилган.

Таъкидланишича, ўтган йили Туркманистон ҳукумати коронавирус инфекциясига қарши курашга жами 46 миллион доллар сарфлаган. Тегишли маблағ БМТ кўмагида ишлаб чиқилган ўткир юқумли касалликларга шайлик ва чоралар кўриш режаси доирасида ишлатилган.

Ушбу маблағнинг 2,5 миллион доллари БМТ ва Туркманистоннинг ривожланиш бўйича шериклари томонидан ажратилган.

Тадбирлар доирасида соғлиқни сақлаш тизимининг барча даражаларидаги тиббиёт ходимларининг салоҳияти мустаҳкамланган, ўткир респиратор касалликлар, шу жумладан, коронавирус инфекцияси ҳақидаги маълумотларни бошқариш механизми кучайтирилган.

Шунингдек, маблағ инфекция профилактикаси ва унга қарши курашга ҳамда аҳолини ҳукумат томонидан кўрилган чоралар ҳақида хабардор қилишга ҳам сарфланган.

Изоҳ
Асосий янгиликлар