Россиядаги муҳожирларга ҳужжатларини расмийлаштириш ва иш қидириш имконини берадиган мобил дастурни 2022 йилда ишга тушириш режалаштирилган. Бу ҳақда Россия бош вазири ўринбосари Алексей Оверчук ўз интервьюсида маълум қилди.
Бу дастур ёрдамида кишилар Россияга киришда ўзи учун чекловлар бор-йўқлигини билиб олади. Агар чекловлар бўлмаса, у бошқа бир қатор хизматлардан фойдалана олади.
«Агар илгари у Россияда яшаган ва ишлаган бўлса, унда СНИЛС (Шахсий ҳисоб рақамининг суғурта рақами) ва ИИН (Солиқ тўловчининг идентификация рақами) бор бўлиши мумкин, агар йўқ бўлса, у учун ушбу ҳужжатлар шакллантирилади. Шундан сўнг иш қидириш, иш берувчига мурожаат қилиш мумкин бўлади», — деди Оверчук. У дастур ёрдамида рўйхатдан ўтиш ҳам мумкин бўлишини айтди.
Шу билан бирга, ушбу дастурдаги барча сервислар ҳам давлат хизматлари билан боғлиқ бўлмайди, дея давом этди бош вазир ўринбосари. «Катта эҳтимол билан бу рақамли давлат-хусусий шериклик бўлади яъни у орқали хусусий хизматлар ҳам кўрсатилади, масалан, тиббий суғурта сотиб олиш ёки уй топиш ва ижарага олиш», — деди у.
Муҳожирлар учун мобил дастур ишлаб чиқилиши ҳақида 2020 йилнинг июнь ойида маълум бўлган. У рўйхатга олиш ва хабардор қилиш учун ягона ахборот платформаси доирасида яратилмоқда. «Коммерсантъ» хабар беришича, уни Рақамли ривожланиш, алоқа ва оммавий ахборот воситалари вазирлиги ишлаб чиқмоқда. Ушу платформа доирасида хорижий фуқаролар тўғрисидаги ягона маълумотлар базаси яратилади ва муҳожирлар шахсий кабинети бўлган мобил дастур орқали тизимдан фойдаланиши мумкин бўлади.
Ички ишлар вазирлиги, шунингдек, муҳожирлар учун бир қатор янгиликларни эълон қилди. Улар Россияда қолиш учун бир дона ҳужжатни олиши керак, шунингдек, мамлакатга кирганида улардан «содиқлик шартномаси»ни имзолаш талаб қилиниши мумкин. Ҳужжатда Россияга кириш-чиқиш қоидалари, мамлакатда қолиш ва ишга жойлашиш, тақиқ ва чекловлар ҳақида маълумот берилади. Ҳужжатга имзо чекиш билан муҳожир ушбу қоидаларни бузиш оқибатлари ҳақида огоҳлантирилганини тасдиқлайди, деб тушунтиради Ички ишлар вазирлиги.
Шунингдек, вазирлик Россияга 90 кундан ортиқ муддатга келадиган меҳнат муҳожирлари ва бошқа чет элликларга электрон ташувчига эга махсус пластик карталар бериш ҳақида таклиф киритган. Чипда бармоқ излари ҳам сақланади.
Изоҳ (0)