Австралияда зилзила оқибатида 50 га яқин бинолар вайрон бўлди (фото ва видео)

Австралиянинг Мельбурндан 10 километр узоқликда жойлашган Мэнсфильд шаҳрида (Виктория штати) 5,9 магнитудали зилзила содир бўлди, деб ёзади «РБК».

The Sydney Morning Herald маълумотларига кўра, ерости силкинишларини Сидней ва Канберра аҳолиси ҳам сезган. Австралиянинг Ер ҳақидаги илм-фан институти аниқлик киритишича, бу Виктория штатида қуруқликда қайд этилган энг йирик зилзиладир.

ABCNews ёзишича, зилзила оқибатида Мельбурнда 46 та бино қисман вайрон бўлган, 35 мингдан ортиқ аҳоли электр токидан узилиб қолган.

Маҳаллий фуқаролардан бири нашрга маълум қилишича, ер силкинган пайтда у яшайдиган олти қаватли уй у томондан бу томонга чайқалган.

Миллий сейсмология хизмати келгуси ҳафталар ёки ҳатто ойлар мобайнида ерости силкинишлари такрорланиши эҳтимолидан огоҳлантирди.

Сейсмологлар маълумотларига кўра, зилзила эпицентри тоғларда жойлашган, ўчоғи 10 километр чуқурликда бўлган.

Австралиялик телебошловчилар эфирни олиб бораётган пайтда зилзила юз бериб, уларни чалғитди.