Перм университетидаги отишмада жабрланганлар сони 43 кишига етди

Перм давлат университетига уюштирилган ҳужум оқибатида жабрланганлар сони 43 кишига етди. Бу ҳақда Перм ўлкаси соғлиқни сақлаш вазири Анастасия Крутенга асосланиб, Meduza хабар берди.

Крутеннинг сўзларига кўра, жабрланувчиларнинг 12 нафари учта шаҳар касалхонасида даволанмоқда. Уларнинг орасида ҳужумчи Тимур Бекмансуровнинг ўзи ҳам бор. «Жароҳат олганларнинг фақат бир нафари оғир аҳволда, бу отишма содир этган шахс. Унинг аҳволи оғир », — деди соғлиқни сақлаш вазирлиги. Крутен 21 сентябрь куни кечқурун ҳужумчининг болдирининг бир қисми кесиб ташланганини тасдиқлади. «Аҳволи беқарор ва жуда оғир», — дея қўшимча қилди расмий.

Аввалроқ Shot Telegram каналига таяниб Meduza Бекмансуровнинг чап оёғи тиззасигача кесиб ташлангани ҳақида хабар берганди.

Маш аниқлик киритишича, Бекмансуровнинг жароҳатларидан бири сонида жойлашгани туфайли, унинг оёғини ампутация қилишга тўғри келган. Бундан ташқари, у ўпкасидан, жигаридан, ичагидан яраланган, сийдик йўлига зарар етган. «Известия» манбасига кўра, тромблар ҳосил бўлгани туфайли оёқ кесиб ташланган.

18 ёшли Тимур Бекмансуров 20 сентябрь куни эрталаб Перм давлат миллий тадқиқот университетида отишма содир этганди. Ҳодисада олти киши ҳалок бўлган.

Бекмансуровнинг ўзи ҳам қўлга олиниш чоғида яраланган. Воқеа жойига етиб келган ЙПХ инспектори Константин Калинин унга қуролни ташлашни буюрган, аммо талаба ўқ узган, шундан кейин инспектор бунга жавобан ўт очган. Бекмансуровни қўлга олиш бўйича ҳаракатлари учун Калинин давлат мукофотига тавсия этилади.

Жароҳати оғир етти киши Москвага даволаниш учун юборилган. Маҳаллий 59.ru ва ProPerm нашрларининг аниқлик киритишича, минтақа Соғлиқни сақлаш вазирлиги жабрланганлар қаторида нафақат ҳужумчини, балки ҳодисада ҳалок бўлган олти кишини ҳам ҳисоблаган.

Бундан аввал ўлка Соғлиқни сақлаш вазирлиги ва Тергов қўмитаси ҳодиса оқибатида 28 киши жароҳатлангани ҳақида хабар берганди. Россия Соғлиқни сақлаш вазирлиги раҳбари Михаил Мурашко 20 сентябрь куни  касалхонада 20 киши борлигини, улардан тўққиз нафарининг аҳволи оғир деб баҳоланаётганини айтган.