Паркентда «Жигули» пиёдани уриб кетиб воқеа жойидан яширинди. Жабрланувчи ҳодиса жойида вафот этди

Тошкент вилояти Паркент туманида «Жигули» пиёдани уриб кетиб, воқеа жойидан яширинган. Бу ҳақда «Дарё»га вилоят ИИББ ахборот хизмати хабар қилди.

Қайд этилишича, 2021 йилнинг 14 сентябрь соат 22:00 ларда Тошкент вилояти Паркент тумани Шампан қишлоғидан ўтган автомобиль йўлидан ҳаракатланиб келаётган номаълум ҳайдовчи пиёда — 1959 йилда Паркент туманида истиқомат қилувчи фуқаро М.Н.ни уриб юбориб, ҳодиса жойидан номаълум тарафга яширинган.

Ушбу йўл-транспорт ҳодисаси оқибатида пиёда М.Н. олган тан жароҳатлари туфайли ҳодиса жойида вафот этган.

Тошкент вилояти ИИББ ЙҲХБ ходимлари ва Паркент тумани ИИБ ЙҲХБ қидирув ва суриштирув инспектори сержант Ж.Ашрапов томонидан олиб борилган тезкор суриштирув ишлари натижасида ушбу йўл транспорт ҳодисасини 1982 йилда туғилган Паркент туманида истиқомат қилувчи фуқаро Ж.Н. томонидан «ВАЗ 2105» русумли автомобилда маст ҳолда бошқариб содир этгани аниқланди.

Ҳозирда «ВАЗ 2105» ҳайдовчисига нисбатан жиноят кодексининг 266- (одам ўлимига сабаб бўлган транспорт бошқариш ва ундан фойдаланиш хавфсизлиги қоидаларини бузиш) ва 117- (хавф остида қолдириш) моддаларига асосан жиноят иши очилиб, фуқаро Ж.Н. эҳтиёт чораси сифатида қамоққа олинган.