Қорқалпоғистоннинг Элликқалъа туманидаги Ақчакўл сув ҳавзасида бир оиланинг 3 нафар аъзоси чўкиб кетди.
Воқеа 23 июль куни юз берган. “Kar24.uz”нинг ёзишича, қидирув-қутқарув ишлари натижасида икки нафар фуқаронинг жасади топилган. Учинчи фуқаронинг жасади ҳодисадан деярли икки кун ўтиб топилган.
“Ақчакўл туризм маркази” Instagram саҳифасида уч киши ҳалок бўлганини тасдиқлаган. Унда айтилишича, “оила сув ҳавзасига ўзларига тегишли қайиқда келган. Кўлнинг ўртасида кема сув ола бошлаган ва чўкиб кетган. Оқибатда уч киши ҳалок бўлган, қолганлари қутқарилган”.
Бош прокуратура матбуот хизмати раҳбари Ҳаёт Шамсутдиновинг “Дарё” сўровига кўра маълум қилишича, Беруний туманида яшаган 38 ёшли эркак М.М. Ақчакўл сув ҳавзасига фарзандлари, турмуш ўртоғи ва жиянлари билан оилавий дам олиш мақсадида келиб, кўлга ўзининг шахий қайиғи билан тушган. Эҳтиётсизлиги оқибатида кўл ўртасига борган вақтида қайиқ чўкиб кетган.
Оқибатда М.М.нинг 36 ёшли турмуш ўртоғи З.Р., ҳамда уларнинг 12 ва 10 ёшдаги қизлари сувда чўкиб, ҳалок бўлган.
Ҳолат юзасидан Жиноят кодексининг 102-моддаси (эҳтиётсизлик орқасидан одам ўлдириш) билан жиноят иши қўзғатилган. Кодексга кўра, эҳтиётсизлик орқасидан икки ва ундан ортиқ одам ўлдириш 2 йилдан 3 йилгача ахлоқ тузатиш ишлари ёки 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.
Изоҳ (0)