Шавкат Мирзиёев Урганчда қурилаётган Жалолиддин Мангуберди мемориал боғини кўздан кечирди

Шавкат Мирзиёев Урганч шаҳрида Жалолиддин Мангуберди мажмуасининг қурилиш жараёнини кўздан кечирди, деб хабар бермоқда Президент матбуот хизмати.

Давлат раҳбари Хоразм вилоятига 2018 йилда амалга оширган ташрифи чоғида Урганч шаҳрида Жалолиддин Мангуберди мемориал боғи ташкил этиш бўйича кўрсатма берган эди. Шунга мувофиқ лойиҳа таклифи тайёрланиб, Президентнинг вилоятга 2020 йил март ойида ташриф чоғида намойиш қилинганди.

Хабарда айтилишича, бу борадаги лойиҳа Президентнинг вилоятга ушбу ташрифи чоғида кўриб чиқилган, мутахассислар фикрлари асосида такомиллаштирилган. Мажмуа шаҳарнинг Ал-Хоразмий ва Ислом Каримов кўчалари кесишмасидаги қарийб 8 гектар майдонда бўлади. Бугунги кунда ҳайкалнинг асоси қурилмоқда. Бронзадан Жалолиддин Мангубердининг от устида қилич тутиб турган ҳайкали ясалган. Унинг асоси билан бирга жами баландлиги қарийб 25 метр бўлиб, узоқдан ҳам кўриниб туради.

Шавкат Мирзиёев мажмуа мазмунини бойитиш, шароитларини яхшилаш бўйича кўрсатмалар берди.

«Бу ер билим, маънавият, ғурур маскани бўлиши керак. Келганлар айланиб, ҳордиқ чиқариши билан бирга Мангуберди бобомиз ҳаётини яққол тасаввур қилиши, бундан руҳ олиши керак. Хиёбон бўйлаб унинг жанглари, қаҳрамонликлари ҳақида лавҳлар ёзиб қўйиш мумкин. Бу тарихни ва чет тилларини яхши билган гидлар тайёрлаш ҳам зарур», — деган Президент.

Қайд этилишича, давлат раҳбари Ал-Хоразмий кўчаси бўйлаб қурилган ерости йўлини ҳам кўздан кечирди. Қурилиш ишлари битгач, ҳудуд ободонлаштирилиб, манзарали дарахтлар экилади, фавворалар барпо этилади. Пиёдалар ва велосипед йўлаклари, туризм хизматлари ташкил этилади.

Мажмуани эксплуатация қилишни тўғри йўлга қўйиш, бу ерда байрам тадбирлари,  фестиваллар ўтказиш учун ҳам шароит яратиш бўйича кўрсатмалар берилди.