Бухорода Миллий гвардия ходимига қаршилик кўрсатган фуқарога нисбатан жиноят иши қўзғатилди

Бухоро шаҳрида ўз хизмат вазифасини бажараётган Миллий гвардия ҳарбий хизматчисининг қонуний талабларини бажармасдан, унга фаол қаршилик кўрсатиб, тан жароҳати етказган фуқарога нисбатан жиноят иши қўзғатилди. Бу ҳақда «Дарё»га Миллий гвардия вилоят бўйича бошқармаси офицери, катта лейтенант Муроджон Раҳматуллаев хабар берди.

Миллий гвардия ходими фуқаролардан ўзини таништиришини талаб қилган. А.Ш. эса унга ўз турмуш ўртоғи билан жанжаллашаётганини ва ходимнинг мазкур ҳолатга аралашмаслигини айтган. Спиртли ичимлик таъсиридаги фуқаро жамоат жойида тартиббузарликда давом этган. Вазият чигаллашгач, Миллий гвардия ходими ҳамкасбларини ёрдамга чақирган. Ҳолат жойига Миллий гвардия ходимлари етиб келиб, А.Ш.нинг қаршилик қилишига қарамай, уни хизмат автомашинасига миндиришга ҳаракат қилган. Бироқ А.Ш. яна фаол қаршилик кўрсатишда давом этган. Миллий гвардия ходимлари унга нисбатан куч ишлатишга мажбур бўлган. Қаттиқ ғазабда бўлган А.Ш. хизмат вақтида уни ушлашга уриниб, бехосдан йиқилиб тушган Иброҳим Шодиевнинг оёқларига бир неча марта тепиб, жароҳат етказган.

Фуқаро А.Ш.нинг шахси аниқланганда, унинг муқаддам бир неча маротаба жиноий хатти-ҳаракатлари учун жавобгарликка тортилгани, қамалиб чиққани маълум бўлган.

«Жамиятда юриш-туриш қоидаларини қасддан менсимаган А.Ш. жанжалнинг олдини олиш учун келган Миллий гвардия ҳарбий хизматчиси, кичик сержант Иброҳим Шодиевга оғир тан жароҳати етказган. Буни суд тиббий экспертизаси хулосаси ҳам тасдиқлаган. Шу боис унга нисбатан жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилди», — дейди Муроджон Раҳматуллаев.

Айни пайтда тергов ҳаракатлари олиб борилмоқда.