Бразилия президенти Жаир Болсонару эмланганик сертификати йўқлиги сабабли Нью-Йоркдаги ресторанларга киритилмади. Бу ҳақда Reuters хабар берди.
Бразилия президенти Жаир Болсонару (чапдан учинчи) бир қатор сиёсатчилар билан Нью-Йоркда БМТ Бош Ассамблеяси олдидан пицца емоқда.
Фото: Reuters
Бразилия делегациясидан Вазирлар Маҳкамасининг икки амалдори ижтимоий тармоққа жойлаштирган фотосуратда Бразилия президенти ўзи жойлашган «Манхэттен» меҳмонхонаси ташқарисидаги йўлнинг ўртасида пицца еб турганини кўриш мумкин.
Шу ҳафта Нью-Йоркда Бирлашган Миллатлар Ташкилоти (БМТ) Бош Ассамблеясининг учрашуви бўлиб ўтмоқда. Ассамблея доирасида ташкил этилган биринчи оқшомда иштирок этган Болсонарунинг тарафдорлари Бразилия раҳбаридаги «оддийлик»ни юқори баҳолади. Кейинчалик Нью-Йоркдаги анъанавий Бразилия таомлари ресторани пиёдалар йўлагининг бир қисмини тўсиб қўйишга мажбур бўлди, у ерда меҳмонлар учун, айниқса Болсонару ва унга ҳамроҳ бўлганлар учун дастурхон ёзилди.
Ташкилот маъмурияти Бразилия президенти учун ташқаридан жой қилишга мажбур бўлди, чунки Нью-Йоркда амалдаги санитария қоидалари COVID-19 вакцинасини олмаган одамларга кафе, ресторан ва бошқа овқатланиш шохобчаларига киришга рухсат бермайди.
Ўтган ҳафта Бош Ассамблея раиси Абдулла Шаҳид БМТга аъзо 193 давлатнинг президентлари, бош вазирлари ва дипломатлари учун ҳам ташкилотнинг COVID-19 га қарши вакцинация тизими амалда қолиши ҳақида хабар берганди. Улардан эмланганлик ҳақида далил кўрсатиш талаб қилинмайди. Шунга қарамай, Нью-Йорк мэри Билл де Блазио дунё мамлакатлари раҳбарларидан БМТ йиғилишида қатнашишдан олдин эмланишни сўраган.
Учрашувда Буюк Британия бош вазири Борис Жонсоннинг эмланганмисиз ёки йўқми, деган саволига Болсонару: «Йўқ, ҳали», деб жавоб берди.
Таъкидлаш жоизки, Бразилия президенти пандемия бошиданоқ ниқоб тақишдан бош тортиб, изоляция чораларини қўллашга қарши бўлган ва бир неча бор мутахассисларнинг чақирувларини эътиборсиз қолдирган. Шунингдек, у вирус тарқалаётганига қарамай, чет элликларнинг мамлакатга киришига рухсат берган.
Май ойида Бразилиянинг Маранян штати ҳукумати Болсонаруни Асайландия шаҳрига ташрифи чоғида акция учун одамларни тўплагани, аммо ўзи бу вақтда ниқобсиз ҳолда бўлгани учун жаримага тортган.
