Жонс Ҳопкинс университети маълумотларига кўра, АҚШда COVID-19 қурбонларининг сони мамлакатда 1918—1919 йилларда тарқалган испан гриппи туфайли вафот этганлар сонидан ошиб кетди. Испан гриппи пандемияси Америка ва жаҳон яқин тарихидаги энг жиддийси ҳисобланарди.
АҚШ Касалликларни назорат қилиш ва олдини олиш маркази (CDC) маълумотларига кўра, АҚШда 675 мингга яқин одам испан гриппи қурбонига айланган. COVID-19 дан ўлим бўйича статистик маълумотлар эса аллақачон бу рақамлардан ошиб кетди — Ҳопкинс университети маълумотларига кўра, АҚШда 676 минг киши коронавирус оқибатида вафот этган.
Испан гриппи билан касалланишнинг биринчи ҳолатлари АҚШда 1918 йилнинг баҳорида ҳарбий хизматчилар орасида қайд этилган. Ушбу касалликни Европага биринчи жаҳон урушида қатнашиш учун келган ҳарбийлар олиб келган, деб ҳисобланилади. Шундан кейин касаллик бутун Африка, Ҳиндистонга тарқалиб, Россия империясига етиб келган. Пандемия 1919 йилнинг баҳорида заифлаша бошлаган.
Турли манбаларга кўра, испан гриппи билан 500 дан 600 миллионгача одам касалланган, дейилади «Роспотребнадзор» сайтида. Бу кўрсаткич ўша пайтда Ер аҳолисининг 25—30 фоизини ташкил қиларди. Пандемияда 50 дан 100 миллионгача одам вафот этган. Муассаса ушбу пандемияни бутун инсоният тарихидаги энг кенг тарқалгани деб атайди.
Жонс Ҳопкинс университети маълумотларига кўра, 2019 йил охиридан буён дунёда 229 миллион одамга коронавирус ташхиси қўйилди, шулардан 4,69 миллион киши вафот этди. АҚШ инфекцияга чалинганлар ва ундан вафот этганлар сони бўйича дунёда биринчи ўринда туради (мамлакатда 42,2 миллион кишида касаллик қайд этилган). Иккинчи ўринда Ҳиндистон (33,47 млн киши касалланган, 445,1 минг киши вафот этган), учинчи ўринда Буюк Британия (7,5 млн киши касалланган, 135,5 минг киши вафот этган) туради. Эрон ва Бразилия кучли бешликни якунлайди.
Август ойининг бошида АҚШда дельта штамми туфайли коронавирус тарқалиши кескин тезлашгани маълум қилинди. CDC вакиллари, агар фуқароларнинг кўпчилиги эмланмаса, касалланиш ва касалхонага ётқизишлар сони ошиши ҳақида огоҳлантирди. Уларнинг сўзларига кўра, бундай ҳолатда кунлик касалланишлар сони бир неча юз минглаб кишини ташкил қилиши мумкин.
Изоҳ (0)