Шимолий Корея янги қанотли ракетани муваффақиятли учиргани ҳақида эълон қилди

Шимолий Корея узоқ масофага мўлжалланган янги қанотли ракетани муваффақиятли тарзда синовдан ўтказди. Бу ҳақда Корея марказий телеграф агентлигига таяниб, «РБК» хабар берди.

Ракета 1,5 минг километр масофада жойлашган нишонга тегди, дейилади хабарда. Янги қанотли ракетани ишлаб чиқиш сўнгги икки йилдан буён давом этаётганди. Бу вақт ичида қуролнинг алоҳида қисмлари синовлардан муваффақиятли ўтган.

Корея марказий телеграф агентлиги таъкидлашича, янги ракета «мудофаа соҳасини ва қурол тизимини ривожлантириш бўйича беш йиллик режанинг асосий мақсадига эришишда катта аҳамиятга эга» стратегик қуролдир. Қайд этилишича, бу Меҳнат партияси Марказий қўмитасининг «алоҳида эътибор» билан амалга оширилган «асосий ишидир».

«Ракета давлатимиз хавфсизлигини ишончли тарзда таъминлайдиган ва душман кучларнинг республикамизга қарши ҳарбий юришларини қатъиян олдини олувчи бошқа самарали воситалардан қолишмайдиган стратегик аҳамиятга эга», — дейилади Пхенян баёнотида.

Шимолий Кореянинг муваффақиятли ракета синови ҳақидаги даъволари Япониянинг хавотирига сабаб бўлмоқда.

«Бу (ракета учирилиши) мамлакат хавфсизлигига таҳдид солади ва Япония учун ташвиш уйғотади», — деди Япония ҳукумати бош котиби Кацунобу Като.

Унинг сўзларига кўра, Япония ҳукумати КХДРнинг ҳарбий соҳадаги барча ҳаракатларини диққат билан кузатиб бормоқда, бироқ учирилган ракета Япониянинг эксклюзив иқтисодий зонасига ўтгани ҳали тасдиқланмаган. «Айни пайтда биз батафсил таҳлил олиб бормоқдамиз», — дея қўшимча қилди у.

Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилганди. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб тегган.

Бундан ташқари, КХДР Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.

Кейинроқ Шимолий Корея томонидан баллистик ракеталарнинг учирилиши АҚШ ва Япониянинг доимий таҳдидлари олдида ўзини ҳимоя қилиш бўлгани ҳақида айтилди.