Shimoliy Koreya uzoq masofaga mo‘ljallangan yangi qanotli raketani muvaffaqiyatli tarzda sinovdan o‘tkazdi. Bu haqda Koreya markaziy telegraf agentligiga tayanib, “RBK” xabar berdi.
Raketa 1,5 ming kilometr masofada joylashgan nishonga tegdi, deyiladi xabarda. Yangi qanotli raketani ishlab chiqish so‘nggi ikki yildan buyon davom etayotgandi. Bu vaqt ichida qurolning alohida qismlari sinovlardan muvaffaqiyatli o‘tgan.
Koreya markaziy telegraf agentligi ta’kidlashicha, yangi raketa “mudofaa sohasini va qurol tizimini rivojlantirish bo‘yicha besh yillik rejaning asosiy maqsadiga erishishda katta ahamiyatga ega” strategik quroldir. Qayd etilishicha, bu Mehnat partiyasi Markaziy qo‘mitasining “alohida e’tibor” bilan amalga oshirilgan “asosiy ishidir”.
“Raketa davlatimiz xavfsizligini ishonchli tarzda ta’minlaydigan va dushman kuchlarning respublikamizga qarshi harbiy yurishlarini qat’iyan oldini oluvchi boshqa samarali vositalardan qolishmaydigan strategik ahamiyatga ega”, — deyiladi Pxenyan bayonotida.
Shimoliy Koreyaning muvaffaqiyatli raketa sinovi haqidagi da’volari Yaponiyaning xavotiriga sabab bo‘lmoqda.
“Bu (raketa uchirilishi) mamlakat xavfsizligiga tahdid soladi va Yaponiya uchun tashvish uyg‘otadi”, — dedi Yaponiya hukumati bosh kotibi Katsunobu Kato.
Uning so‘zlariga ko‘ra, Yaponiya hukumati KXDRning harbiy sohadagi barcha harakatlarini diqqat bilan kuzatib bormoqda, biroq uchirilgan raketa Yaponiyaning eksklyuziv iqtisodiy zonasiga o‘tgani hali tasdiqlanmagan. “Ayni paytda biz batafsil tahlil olib bormoqdamiz”, — deya qo‘shimcha qildi u.
Eslatib o‘tamiz, 25-mart kuni Shimoliy Koreya ikkita taktik raketaning muvaffaqiyatli sinovlari haqida ma’lum qilgandi. Koreyalik harbiylar xabariga ko‘ra, ikkala raketa ham KXDR sharqiy qirg‘oqlaridan 60 kilometr masofada joylashgan nishonga muvaffaqiyatli borib teggan.
Bundan tashqari, KXDR Yapon dengiziga qarata ikkita ballistik raketani uchirdi. Raketa sinovlari haqida Yaponiya Mudofaa vazirligi va Janubiy Koreya harbiylari ma’lum qilgan. Bungacha esa AQSh harbiylari Pxenyan tez orada ballistik raketalar uchirishni qayta boshlashi haqida ogohlantirgan edi.
Keyinroq Shimoliy Koreya tomonidan ballistik raketalarning uchirilishi AQSh va Yaponiyaning doimiy tahdidlari oldida o‘zini himoya qilish bo‘lgani haqida aytildi.
Izoh (0)