Россиянинг Иркутск вилояти губернатори Игорь Кобзев Казачинское қишлоғи яқинида L-410 самолёти қулаши оқибатида ҳалок бўлганлар учун 15 сентябрни мотам куни деб эълон қилди. Бу ҳақда вилоят ҳуқуқий ахборот расмий интернет-порталига таяниб, Anadolu Agency хабар берди.
«2021 йил 12 сентябрь куни ‘СиЛА’ авиакомпаниясининг L-410 самолёти билан содир бўлган ҳалокат қурбонлар учун қайғу, уларнинг оила аъзолари ва яқинларига ҳамдардлик билдирган ҳолда, Иркутск вилояти низомининг 59-моддасига биноан мен 2021 йил 15 сентябрни Иркутск вилояти ҳудудида мотам куни деб эълон қилишга қарор қилдим», — дейилади ҳужжатда.
Шунингдек, губернатор қурбонлар ва жароҳатланганларнинг оилаларига товон пули тўланишини маълум қилган: қурбонларнинг ҳар бири учун 1 миллион рублдан, оғир аҳволдагилар учун 500 минг рублдан, ўртача оғирликдаги беморлар учун 250 минг рублдан, енгил жароҳат олганлар учун 100 минг рублдан тўлаб берилади.
12 сентябрь, якшанба куни Иркутскдан мунтазам парвозни амалга ошираётган L-410 йўловчи самолёти Казачинское қишлоғидан 4 км узоқликда қўниш пайтида қулаб тушган. Тўрт киши, шу жумладан, учувчи ҳалок бўлган.
12 киши касалхонага ётқизилган. Тўрт нафар жабрланувчининг аҳволи оғир, қолганлари шифокорлар назорати остида. Йўловчилардан бири тиббий кўрикдан сўнг шифохонани тарк этди.
«СиЛА» авиакомпанияси вакилига кўра, бортида 16 киши бўлган самолёт қўнишга қайта уринганда қулаб тушган. Фалокат оқибатларини бартараф этиш бўйича тезкор штаб воқеа техник носозлик туфайли содир бўлган деб ҳисобламоқда.
Авиакомпаниянинг «РИА Новости»га маълум қилишича, L-410 самолётининг қулашига ускуналарнинг ишламай қолгани ва туманда кўриш даражасининг ёмонлашгани сабаб бўлган бўлиши мумкин.
Тергов қўмитаси ҳаракат хавфсизлиги ва ҳаво транспортидан фойдаланиш қоидаларини бузиш (Жиноят кодексининг 263-моддаси) моддаси бўйича жиноий иш қўзғатди. Ушбу модда бўйича айбдор деб топилганлар беш йилгача озодликдан маҳрум қилиниши мумкин.
Бундан бир ой аввал, 12 август куни Россиянинг Камчатка ўлкасида сайёҳларни олиб кетаётган Ми-8 вертолёти кўлга қулаб тушганди. Ми-8 бортида 16 киши бўлган, улардан 8 нафари бедарак йўқолган.
Шунингдек, 6 июль куни Россиянинг Петропавловск-Камчатский шаҳридан Палана посёлкасига йўловчи парвозини амалга ошираётган Ан-26 самолёти денгизга қулаган эди. Самолёт бортида 28 киши бўлган. Ҳалокатдан сўнг Россияда уч кунлик мотам эълон қилинганди. Дастлаб қутқарувчилар самолёт қулаб тушиши оқибатида ҳалок бўлган олти кишининг жасадини топишга муваффақ бўлган, улар сувдан чиқариб олинган. 9 июль куни Ан-26 самолётидаги барча йўловчилар ва экипаж аъзоларининг жасади топилган.
Изоҳ (0)