АҚШда содир этилган терактларининг 20 йиллигига бағишлаб 11 сентябрь куни эълон қилинган видеороликда «Ал-Қоида» террорчилик ташкилоти етакчиси Айман аз-Завоҳирий кўриниш берди. Бу ҳақда террорчиларнинг Интернетдаги фаоллигини кузатиб борувчи SITE ташкилоти раҳбари Рита Кац маълум қилган.
SITE хабар беришича, «Ал-Қоида» раҳбарининг видеоси қачон ёзиб олингани номаълум. 60 дақиқалик мурожаатида Айман аз-Завоҳирий «Қуддус ҳеч қачон яҳудийларники бўлмайди», — деб айтган ва «Ал-Қоида» террорчиларининг терактларини, жумладан, 2021 йил январь ойида Суриянинг Ракка шаҳрида Россия қўшинларига уюштирилган ҳужумни мақтаган, деб ёзади Associated Press.
Шунингдек, у Афғонистондан Америка қўшинларининг олиб кетилишини тилга олган, бу ҳақда «Толибон» ва АҚШ 2020 йилнинг февраль ойида келишиб олган эди. Аммо аз-Завоҳирий 2021 йилнинг август ойида «Толибон» Афғонистонни эгаллаб, Кобулни ўз назоратига олгани тўғрисида ҳеч нарса демаган. Бу шуни англатадики, видео эълон қилинганидан анча олдинроқ ёзилган.
12 сентябрь куни АҚШ разведкаси собиқ раҳбари Майкл Морелл CBS телеканалига берган интервьюсида аз-Завоҳирий Афғонистонда яширингани тахмин қилинаётганини айтди. «Бизнинг фикримизча, ‘Толибон’ бугун аз-Завоҳирийга бошпана бериб, уни яширяптими, демак у ‘Ал-Қоида’ни ҳимоя қиляпти»,— деди Морелл.
2020 йил май ойидаёқ БМТ «Ал-Қоида»нинг «юзлаб қуролланган жангарилари», шунингдек аз-Завоҳирий ҳам Афғонистонда эканини маълум қилганди.
Ташкилотнинг таъкидлашича, «Толибон» ва «Ал-Қоида» ўртасидаги алоқалар эски муносабатлар, биргаликдаги курашлар ва ўхшаш мафкураларга асосланган ҳолда яқинлигича қолмоқда. «Толибон», шунингдек, «Ал-Қоида»га «тарихий алоқалар» инобатга олинишини кафолатлаган.
Associated Press агентлигининг таъкидлашича, 2020 йил охирида «Ал-Қоида» раҳбарининг ўлими ҳақида тасдиқланмаган хабарлар пайдо бўлганди. 11 сентябрь куни чиқарилган видео аз-Завоҳирийнинг ўлими ҳақидаги миш-мишлардан кейинги биринчи тасвир.
Айман аз-Завоҳирий 2011 йилда Усама бин Ладен ўлдирилганидан кейин «Ал-Қоида»нинг етакчисига айланган эди.
Мавзуга доир:
Изоҳ (0)