«Давлат маблағи шахсий маблағим эмас, шартнома бўлсагина, тўлаб берамиз». Тадбиркордан қарздор экани айтилган қашқадарёлик мансабдор вазиятга изоҳ берди

Ёшлар ишлари агентлигининг Қашқадарё вилояти бошқармаси тадбиркордан 20 миллион сўм қарздор экани ҳақида хабар берилди. Мазкур айбловга муносабат билдирган масъул — агентликнинг вилоятдаги раҳбари Темур Поёнов ушбу қарздорликни асословчи шартнома йўқлигини, шу сабаб давлат маблағини мақсадсиз сарфлай олмаётганини очиқлади.

Қайд этилишича, қаршилик тадбиркор шаҳардаги чойхонасида Ёшлар ишлари агентлигининг вилоят бошқармаси ташаббуси билан ташкил этилган ёшлар фестивалида ёшларга тушлик қилиб берган. Бироқ тадбиркорнинг шу харажати тўққиз ойдан бери қоплаб берилмаган.

Мазкур айбловга агентликнинг вилоят бошқармаси мансабдори — бошқарма бошлиғи Темур Поёновнинг шахсан ўзи жавоб берган.

«Ҳурматли Қашқадарё ёшлари ва ҳурматли блогерлар! 2020 йилнинг декабрь ойида ўтказилган фестивалда мен бошқарма бошлиғи ўринбосари лавозимида фаолият кўрсатганман ва менда давлат харидлари ва шартномаларни имзолаш ваколати бўлмаган. Собиқ бошқарма бошлиғи Шоҳжаҳон Омонов ҳам март ойига қадар, агар ушбу қарздорлик ҳақиқатан мавжуд бўлса, тўлаб бермаган. Маҳаллий ҳокимликлар ва уларга тегишли бошқармаларнинг ҳар қандай савдоси очиқ аукцион биржалари орқали амалга оширилишини ва ҳар қандай давлат маблағларининг фойдаланиш тартиби тегишли низомда аниқ, батафсил келтириб ўтилган», — дейди Темур Поёнов вазиятга аниқлик киритар экан.

Темур Поёновнинг айтишича, фестивалда ёшларга тушлик қилиб берган тадбиркор ва бошқарма ўртасида ҳеч қандай шартнома имзоланмаган.

«Афсуски, 2020 йилнинг декабрь ойидаги фестиваль маблағларини тўлаб бериш юзасидан тадбиркор ва ташкилот ўртасида ҳеч қандай шартнома имзоланмаган. Ваҳоланки, бошқарма маблағи бу — давлат маблағлари, менинг шахсий маблағим эмас ва унинг қонуний сарфланиши юзасидан Давлат назорат ва тафтиш бошқармаси ҳамда прокуратура органлари ваколатли юридик шахс эканлигини эслатиб ўтаман», — дейди Темур Поёнов.

Бошқарма бошлиғи тадбиркор томонидан агентликка асослантирилган ҳужжатлар тақдим этилса, барча маблағларни тўлаб беришини маълум қилган.

Эслатиб ўтамиз, агентликнинг тадбиркордан қарздорлиги юзага келган пайтда бошқарма бошлиғи лавозимида ўтирган Шоҳжаҳон Омонов жамоатчиликка агентликнинг туман бўлими раҳбарларини тайинлашда агентлик суҳбатидан ўтган ва улар тавсия қилган номзодларни эмас, бошқаларни тайинлаши билан, шунингдек, республика ташкилоти суҳбатидан ўтган раҳбарликка номзодларни «тажрибасиз, режасиз, ёшларнинг муаммоларидан бехабар» деб аташи билан танилганди.