“Davlat mablag‘i shaxsiy mablag‘im emas, shartnoma bo‘lsagina, to‘lab beramiz”. Tadbirkordan qarzdor ekani aytilgan qashqadaryolik mansabdor vaziyatga izoh berdi

Yoshlar ishlari agentligining Qashqadaryo viloyati boshqarmasi tadbirkordan 20 million so‘m qarzdor ekani haqida xabar berildi. Mazkur ayblovga munosabat bildirgan mas’ul — agentlikning viloyatdagi rahbari Temur Poyonov ushbu qarzdorlikni asoslovchi shartnoma yo‘qligini, shu sabab davlat mablag‘ini maqsadsiz sarflay olmayotganini ochiqladi.

Qayd etilishicha, qarshilik tadbirkor shahardagi choyxonasida Yoshlar ishlari agentligining viloyat boshqarmasi tashabbusi bilan tashkil etilgan yoshlar festivalida yoshlarga tushlik qilib bergan. Biroq tadbirkorning shu xarajati to‘qqiz oydan beri qoplab berilmagan.

Mazkur ayblovga agentlikning viloyat boshqarmasi mansabdori — boshqarma boshlig‘i Temur Poyonovning shaxsan o‘zi javob bergan.

“Hurmatli Qashqadaryo yoshlari va hurmatli blogerlar! 2020-yilning dekabr oyida o‘tkazilgan festivalda men boshqarma boshlig‘i o‘rinbosari lavozimida faoliyat ko‘rsatganman va menda davlat xaridlari va shartnomalarni imzolash vakolati bo‘lmagan. Sobiq boshqarma boshlig‘i Shohjahon Omonov ham mart oyiga qadar, agar ushbu qarzdorlik haqiqatan mavjud bo‘lsa, to‘lab bermagan. Mahalliy hokimliklar va ularga tegishli boshqarmalarning har qanday savdosi ochiq auksion birjalari orqali amalga oshirilishini va har qanday davlat mablag‘larining foydalanish tartibi tegishli nizomda aniq, batafsil keltirib o‘tilgan”, — deydi Temur Poyonov vaziyatga aniqlik kiritar ekan.

Temur Poyonovning aytishicha, festivalda yoshlarga tushlik qilib bergan tadbirkor va boshqarma o‘rtasida hech qanday shartnoma imzolanmagan.

“Afsuski, 2020-yilning dekabr oyidagi festival mablag‘larini to‘lab berish yuzasidan tadbirkor va tashkilot o‘rtasida hech qanday shartnoma imzolanmagan. Vaholanki, boshqarma mablag‘i bu — davlat mablag‘lari, mening shaxsiy mablag‘im emas va uning qonuniy sarflanishi yuzasidan Davlat nazorat va taftish boshqarmasi hamda prokuratura organlari vakolatli yuridik shaxs ekanligini eslatib o‘taman”, — deydi Temur Poyonov.

Boshqarma boshlig‘i tadbirkor tomonidan agentlikka asoslantirilgan hujjatlar taqdim etilsa, barcha mablag‘larni to‘lab berishini ma’lum qilgan.

Eslatib o‘tamiz, agentlikning tadbirkordan qarzdorligi yuzaga kelgan paytda boshqarma boshlig‘i lavozimida o‘tirgan Shohjahon Omonov jamoatchilikka agentlikning tuman bo‘limi rahbarlarini tayinlashda agentlik suhbatidan o‘tgan va ular tavsiya qilgan nomzodlarni emas, boshqalarni tayinlashi bilan, shuningdek, respublika tashkiloti suhbatidan o‘tgan rahbarlikka nomzodlarni “tajribasiz, rejasiz, yoshlarning muammolaridan bexabar” deb atashi bilan tanilgandi.