Бухоро вилоятининг Олот туманида 62 ёшли аёл яшаш уйида 50 минг сўм эвазига фуқаролар — З.М. ва А.Ҳ.ларнинг жинсий алоқа қилиши учун шароит яратиб берган. Бу ҳақда «Дарё»га Олот туман ИИБ масъули хабар берди.
Қайд этилишича, мазкур ҳолат туманда ўтказилган «Орият» тадбирида фош этилган.
Таъкидланишича, туман ички ишлар бўлими тезкор гуруҳи ходимлари томонидан «Халқобод» маҳалласида кенг қамровли профилактик тадбир ўтказилган. Тадбирда 62 ёшли нафақадаги аёл Х.М. уйи ётоқхонасида З.М. ҳамда А.Ҳ.ларнинг ишқий муносабатда бўлиши учун шароит яратиб бергани маълум бўлган.«50 минг сўм пул эвазига ўз уйи ётоқхонасида фоҳишахона сақлаб келган Х.М. нинг бундан илгари ҳам қўшмачилик билан шуғулланиб келгани ойдинлашди», — дейди ИИБ масъули.
Айтилишича, мазкур ҳолат юзасидан туман ИИБ ҳузуридаги тергов гуруҳи томонидан Х.М.га нисбатан Жиноят кодексининг 131-моддаси (қўшмачилик қилиш ёки фоҳишахона сақлаш) билан жиноят иши қўзғатилиб, дастлабки тергов ҳаракатлари давом эттирилмоқда.
Эслатиб ўтамиз, шу модда билан айбланган фуқаронинг айби исботланса, у базавий ҳисоблаш миқдорининг эллик бараваридан етмиш беш бараваригача миқдорда жарима ёки уч юз олтмиш соатгача мажбурий жамоат ишлари ёхуд уч йилгача ахлоқ тузатиш ишлари билан жазоланиши мумкин.
Изоҳ (0)