«Малика» савдо мажмуаси олдида сотувчилар ўртасида пичоқбозлик юз бериб, 44 ёшли киши ўлдирилди

Тошкентдаги «Малика» савдо мажмуаси олдида пичоқбозлик бўлгани ҳақида видео тарқалди. Пойтахт ИИББ ҳолат юзасидан расмий маълумот берди.

Қайд этилишича, 12 сентябрь куни тахминан соат 12:00 ларда Шайхонтоҳур тумани КХАЙ ва Лабзак кўчалари кесишмаси ёнида жойлашган кафенинг олдида «Малика» савдо мажмуасида телефон савдоси билан шуғулланувчи бир нечта фуқаролар ўртасида жанжал юзага келган.

Жанжал оқибатида 1977 йилда туғилган Т.Б. кўкрак қафаси соҳасида санчилиб кесилган жароҳатлари билан вафот этган. Шунингдек, 1988 йилда туғилган М.А. бир неча жойидан санчилиб кесилган жароҳатлари билан тиббиёт муассасасига олиб борилган.

Жиноятни содир этишда гумонланаётганларни аниқлаш, шунингдек, жиноят гувоҳлари билан тергов ҳаракатларини амалга ошириш учун жанжалда иштирок этган барча шахслар ички ишлар бўлимига олиб борилган. Ушбу шахсларни ички ишлар бўлимига олиб бориш жараёни акс этган видео, шунингдек, воқеа жойини ўраб олиб кўздан кечириш жараёни акс этган видео ижтимоий тармоқларда тарқалган.

Ҳозирда мазкур ҳолат юзасидан Тошкент шаҳар прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, тергов ҳаракатлари олиб борилмоқда.

Қайд этиш жозики, бу «Малика» савдо мажмуасида юз берган биринчи пичоқбозлик эмас. 2020 йилнинг 8 декабрида ушбу савдо мажмуасида икки йигитнинг жанжали пичоқбозлик билан тугаганди. 2021 йилнинг январида ушбу пичоқбозлик акасининг ўчини олмоқчи бўлган ука томонидан содир этилгани, айбланувчи ҳам, жабрланувчи ҳам қидирилаётгани маълум бўлганди. Ундан бир неча йил аввал ҳам ушбу савдо мажмуасида сотувчилар ортасида пичоқбозлик юз берганди.