Беларусь Россиядан қиймати бир миллиард доллардан кўпроқ бўлган қурол-яроғ сотиб олишни режалаштирмоқда. Бу ҳақда мамлакат раҳбари Александр Лукашенко маълум қилди.
«Булар ўнга яқин самолёт, уларнинг бир қисми аллақачон етиб келган, ўнлаб вертолётлар, Тор-М2 (зенит-ракета комплекси)дан иборат бўлади», — таъкидлади Лукашенко.
Шунингдек, у Москвада Россия президенти Владимир Путин билан музокараларда С-400 етказиб бериш масаласини муҳокама қилганини айтди.
«Биз музокаралар олиб боряпмиз ва С-400 етказиб беришни режалаштиряпмиз. Владимир Путин билан мудофаа ва хавфсизлик масалаларига катта эътибор қаратдик »,— деди Лукашенко «Ғарб —2021» ҳарбий машғулотларида.
1 сентябрь куни ҳам Лукашенко Россия тез орада Беларусга ўнлаб самолётлар, вертолётлар, ҳаво ҳужумидан мудофаа тизимларини ва, эҳтимол, С-400 зенит-ракета комплексини ҳам етказиб беришини айтганди. 12 сентябрь куни эса у Россия 2025 йилгача «катта миқдорда» қурол етказиб беришини маълум қилди.
9 сентябрь куни Владимир Путин ва Александр Лукашенко Москвада музокаралар олиб борди ҳамда Россия ва Беларусни бирлаштиришга қаратилган 28 та ҳамкорлик дастурини келишиб олди. Иттифоқ дастурлари ҳақида тафсилотлар ошкор қилинмаган.
Беларусь — Россиядан энг катта қарз олган давлат. Жаҳон банки маълумотларига кўра, 2019 йил охирида Беларуснинг Россиядан қарзи 8,1 миллиард долларни ташкил қилган. 2020 йил декабрь ойида Россия Беларусга яна 1 миллиард долларлик кредит ажратган.
Изоҳ (0)