Россия Фавқулодда вазиятлар вазирлиги раҳбари Евгений Зиничев 56 ёшида, Норилскдаги ҳарбий машғулотлар чоғида вафот этди, деб ёзади «Коммерсантъ». Маълумотни Фавқулодда вазиятлар вазирлиги тасдиқлаган.
Фото: «Коммерсантъ»
«Шуни афсус билан маълум қиламизки, Норилскда Арктика зонасини фавқулодда вазиятлардан ҳимоя қилиш, одамларнинг ҳаётини сақлаб қолиш бўйича идоралараро машғулотларда, фавқулодда вазиятлар вазири Евгений Зиничев фожиали тарзда вафот этди», — дейилади хабарда.
«РБК» ўз манбасига таяниб хабар беришича, Зиничев машғулотларга оид съёмка пайтида вафот этган. Вазир суратга олиш гуруҳининг жарлик четида сирғалиб кетган аъзосини ушлаб қолишга уринган. Нашр суҳбатдошининг сўзларига кўра, суратга олиш гуруҳи ходими ҳам вафот этган.
RT телеканали бош муҳаррири Маргарита Симоняннинг айтиб беришича, Евгений Зиничев оператор билан бирга жарлик четида турган. «Операторнинг оёғи тойиб, сувга тушиб кетди. Зиничев унинг ортидан ўзини сувга ташлади ва туртиб чиққан тошга урилди», — деб ёзади муҳаррир ўз Telegram каналида.
Россия президенти матбуот котиби Дмитрий Песков воқеа ҳақида давлат раҳбари Владимир Путинга хабар берилганини айтди.
Фавқулодда вазиятлар вазирининг ўринбосари Александр Чуприян вақтинча вазирлик раҳбари вазифасини бажаради.
Аввалроқ ФВВ Зиничев Красноярск ўлкасига хизмат сафари доирасида Норилскдаги янги ўт ўчириш пункти қурилишининг боришини текширгани ва Дудинский-Арктикадаги қидирув-қутқарув гуруҳига ташриф буюргани ҳақида хабар берганди.
ФВВ раҳбари Арктика зонасида кенг кўламли машғулотлар ўтказилаётгани муносабати билан минтақада бўлиб турган. Машғулотларда 6 минг мутахассис иштирок этмоқда.
Евгений Зиничев 1966 йил 18 августда туғилган. У аввалига армияда, кейин давлат хавфсизлик идораларидаги турли лавозимларда хизмат қилган. 2015 йилда генерал майор унвони билан Федерал хавфсизлик хизмат(ФХХ)нинг Калининград вилояти бошқармаси бошлиғи этиб тайинланган. 2016 йилда у аввал Калининград вилояти губернатори вазифасини бажарувчи, кейин ФХХ директори ўринбосари бўлди. Евгений Зиничев 2018 йил май ойидан буён Фавқулодда вазиятлар вазирлиги раҳбари лавозимини эгаллаб келаётганди.
