Филиппинда Jolina тайфуни туфайли камида 11,8 минг киши эвакуация қилинди. Бу ҳақда Филиппин ахборот агентлигига таяниб, «РИА Новости» хабар берди.
Агентлик хабарига кўра, эвакуация Масбат, Альбай ва Сорсогон провинцияларида амалга оширилган. Ҳозирча қурбонлар ҳақида маълумот йўқ. Бироқ PAGASA Филиппин метеорология хизмати мамлакат шарқига яна бир тайфун — Кика етиб келиши ҳақида огоҳлантирди.
Шиддат билан эсганда янги тайфун марказидаги шамол тезлиги соатига 190 километрга етади.
Jolina тайфуни заифлашган ва шамол тезлиги соатига 160 километрдан ошмаётган бўлса-да, Батангас шаҳри яқинидаги ҳудудлардан бирининг аҳолиси кўчки хавфи ҳақида огоҳлантирилди.
Иккала тайфун ҳам Филиппиннинг шимолий оролларига таъсир кўрсатиб, Хитойнинг жанубий қирғоқларига қараб ҳаракатланмоқда. Филиппин пойтахти Манилада ноқулай об-ҳаво туфайли 8 сентябрь куни мактабларда дарслар бекор қилинди. Университетларда талабаларнинг 80 фоизи онлайн таълим олмоқда.
Филиппинда апрель ойида Суригай тайфуни содир бўлиб, 60 минг киши эвакуация қилинганди. Ўшанда шамол тезлиги 195 километр соатга етиб, уйларнинг томини вайрон қилган ва дарахтларни қўпориб ташлаган.
Изоҳ (0)