Жаҳон соғлиқни сақлаш ташкилоти (ЖССТ) баёнотига кўра, COVID-19 га қарши вакциналарни ғамлаб қўйиш пандемияни узайтиришга ёрдам беради. Бу ҳақда CNBC телеканали хабар берди.
«Бу фақат адолатсизлик, ахлоқсизлик эмас, бу пандемияни ҳам узайтирмоқда», — деди ЖССТнинг шошилинч касалликлар бўлими техник гуруҳи раҳбари Мария Ван Керхов.
БМТ маълумотларига кўра, Европа Иттифоқи ўз аҳолисининг 57 фоизини тўлиқ эмлаган ҳамда Франция ва Буюк Британияда қўшимча дозалар билан эмлашни жорий қилган. Африка эса ўз аҳолисининг атиги 3 фоизини коронавирусга қарши тўлиқ эмлаган, дея хабар беради телеканал.
4 август куни ЖССТ қайта эмлашга мораторий талаб қилганди. Ташкилот сентябрь охиригача дунё аҳолисининг 10 фоизини коронавирусга қарши эмлашга эришиш учун бой давлатлардан ортиқча вакциналарни камбағал мамлакатларга беришни сўраган. ЖССТ режасига кўра, декабрда дунё аҳолисининг 40 фоизи эмланиб бўлиши керак.
Шунингдек, ЖССТ раҳбари вакцина ишлаб чиқарувчиларга энг камбағал мамлакатларга дори-дармон етказиб берувчи COVAX дастурига эътибор қаратишни тавсия қилди.
АҚШ ҳукумати ЖССТнинг коронавирусга қарши қайта эмлашга мораторий жорий этиш таклифини «нотўғри танлов» деб атади. Оқ уй матбуот котибининг сўзларига кўра, АҚШда вакциналар етарли. Шунингдек, Америка Қўшма Штатлари, агар керак бўлса, ўз мамлакатида ревакцинация дастурини тўхтатмасдан ҳам, вакцинага муҳтож мамлакатларга қўшимча дозадаги препаратларни таклиф қилиши мумкин.
Изоҳ (0)