«АрМИ-2021» халқаро армия ўйинларининг 24 йўналишида иштирок этган Ўзбекистон Мудофаа вазирлиги жамоаси мусобақаларни умумжамоа ҳисобида 2-ўрин билан якунлади. Бу ҳақда вазирлик матбуот хизмати «Дарё»га маълум қилди.

Фото: Мудофаа вазирлиги матбуот хизмати

Маълум қилинишича, дунёнинг 11 та давлати ҳудудида ўтказилган «АрМИ-2021» халқаро армия ўйинларида 42 та давлатдан жами 277 та жамоанинг 5000 нафардан зиёд ҳарбий хизматчилари ўзаро куч синашган. Ўзбекистон жамоалари ушбу нуфузли мусобақанинг 24 йўналиши бўйича иштирок этган.

Фото: Мудофаа вазирлиги матбуот хизмати

Таъкидланишича, мазкур беллашувлар давомида ўзбекистонлик ҳарбийлар 4 та олтин, 9 та кумуш ва 4 та бронза медалларини қўлга киритиб, умумжамоа ҳисобида 2-ўринни эгаллаган.

Хусусан:

  • «Содиқ дўст» эркаклар жамоаси 1 та олтин,
  • «Содиқ дўст» аёллар жамоаси 1 та олтин.
  • «Ҳарбий-тиббий эстафета» жамоаси 1 та олтин,
  • «Дала ошхонаси» жамоаси 1 та олтин медалларни қўлга киритган.

«Элбурс ҳалқаси», «Мерганлар марраси», «Отлиқ марафон», «Қуролсоз уста», «Хавфсиз муҳит», «Муҳандис формуласи», «Хавфсиз маршрут», «Қутб юлдузи», «Қўшинлар разведка аълочиси» мусобақаларида 2-ўринлар насиб этган. «Автозирҳли танк техника устаси», «Ишончли қабул», «Йўл патрули», «Саян юриши» беллашувларида эса Ўзбекистон ҳарбийлари учинчи ўринларни эгаллаган.

Фото: Мудофаа вазирлиги матбуот хизмати

Фото: Мудофаа вазирлиги матбуот хизмати

Фото: Мудофаа вазирлиги матбуот хизмати

Фото: Мудофаа вазирлиги матбуот хизмати

Фото: Мудофаа вазирлиги матбуот хизмати

Қайд этилишича, мазкур мусобоқалар давомида жамоалар томонидан жами 37 та рекорд натижа қайд этилган бўлиб, шундан 10 таси Ўзбекистон ҳисобига ёзилган. Хитой — 6 та, Беларусь ва Ҳиндистон — 2 тадан.

Хусусан, «Ҳарбий тиббий эстафета» мусобақасида ўзбекистонлик ҳарбий хизматчилар баҳсларда муносиб иштирок этиб, ўз рақибларини ортда қолдирган ва 3 та рекорд натижаларини янгилаган.

Қизғин ва муросасиз кечган «Элбурс ҳалқаси» мусобақасида кичик сержантлар Санжар Туклиев, Абдумуҳтор Абдуғаниев ва Азимжон Ибрагимов «Тоғ тўсиқлар йўлаги» шартини 12 дақиқа 58 сония билан бажариб, рекорд натижа кўрсатган бўлса, «Музли ҳудуддан ўтиш» шартини адо этишда ҳам жамоамиз пешқадамлик қилган. Мудофаа вазирлиги ҳарбий хизматчилари мазкур вазифани 11 дақиқа-ю 37 сонияда уддалаб, рекордлар сериясини давом эттирган.

«Содиқ дўст» жамоасида сержант Улуғбек Нуриллаев  «300 метрлик тўсиқларни хизмат итлари билан ўтиш» шартида 1 дақиқа 13 сония билан босиб ўтиб, тенгсиз эканини амалда намоён этди ҳамда рекорд ўрнатди.

«Мерганлар марраси» мусобақасининг «Якка синов» беллашувида кичик сержант Фазлиддин Киргизов «Мўлжалга олиш нуқтасини ўзгартириб отиш» машқини 15 дақиқа-ю 6 сонияга бажариб, янги рекорд натижа кўрсатган.

5 сентябрь куни Тошкент халқаро аэропортида «АрМИ-2021» иштирокчиларини тантанали кутиб олиш маросими бўлиб ўтди.

Фото: Мудофаа вазирлиги матбуот хизмати