Ўзбекистон президентлиги сайловига Мақсуда Ворисова номзоди тасдиқланди

Ўзбекистон Халқ демократик партиясининг 6 сентябрь, душанба куни бўлиб ўтган XII қурултойида Ўзбекистон президентлигига партия марказий кенгаши раиси ўринбосари, Олий Мажлис Қонунчилик палатаси депутати Мақсуда Ворисова номзоди съезд делегатларининг кўпчилик овози билан тасдиқланди. Бу ҳақда «Дарё» мухбири хабар бермоқда.

Қурултойда 2021 йил 24 октябрь куни бўлиб ўтадиган Ўзбекистон Президенти сайлови миллий сайлов қонунчилигининг янги тамойиллари, умумеътироф этилган халқаро стандартлар асосида, очиқ ва шаффоф ўтказилиши, сайлов кампанияси даврида барча сиёсий партиялар ва улар томонидан кўрсатилган номзодлар учун соғлом рақобат муҳити, тенг шароит яратилиши зарурлиги алоҳида таъкидланди.

Тадбирда ХДПдан Ўзбекистон президентлигига номзод кўрсатиш тўғрисидаги масала атрофлича муҳокама қилинди.

Делегатлар қурултойда кўриб чиқиш учун тавсия этилган партия марказий кенгаши раиси ўринбосари, Олий Мажлис Қонунчилик палатаси депутати Мақсуда Ворисовани партиядан Ўзбекистон президентлигига номзод сифатида тасдиқлади.

Қурултойда Мақсуда Ворисова «Барчага ғамхўрлик давлатнинг бурчидир!» шиори асосида тўққизта устувор йўналишдан иборат сайловолди дастурини эълон қилди.

Таъкидланишича, дастур лойиҳасининг асосий мақсади мамлакатда ижтимоий тенглик ҳамда халқ демократияси мезонларига мос бўлган давлат ва жамият барпо этишга қаратилган. Хусусан:

• аҳолининг даромадига қараб табақалаштирилган солиқ солиш тизимини жорий этиш;
• ҳар бир инсоннинг минимал ижтимоий хизматларни бепул олишини қонунчилик даражасида кафолатлаш;
• олис ва чекка ҳудудларда шифокорлар ҳамда ўқитувчиларга бўлган эҳтиёжни қоплаш учун «Қишлоқ шифокори» ва «Қишлоқ ўқитувчиси» дастурларини амалга ошириш, уларни моддий ва маънавий рағбатлантириш тизимини қонунчилик асосида мустаҳкамлаш;
• аҳолининг кам таъминланган қатламларига бепул, сифатли ва тўлақонли, шу жумладан профилактика тиббий хизматларни ўз ичига олган тиббий ёрдам кўрсатиш;
• ёшларнинг касб-ҳунар танлаши, бепул ва сифатли таълим олиши, ўқув муассасаларини тугатгандан сўнг ишга жойлашиш кафолатини мустаҳкамлаш;
• пенсия ва ижтимоий нафақа олувчиларнинг ҳаётий эҳтиёжларини тўлақонли қондиришни кафолатлайдиган пенсия ва ижтимоий таъминотнинг мақбул тизимни шакллантириш;
• кам таъминланган, лекин боқимандалик кайфиятида юрган фуқароларни жамиятимизнинг фаол иштирокчисига айлантириш;
• ногиронлиги бўлган шахсларга оид халқаро меъёрлар ва стандартларни миллий қонунчиликка имплементация қилиш;
•  умумхалқ аҳамиятига эга иқтисодиёт тармоқларининг бошқарувида давлат иштирокини мустаҳкамлаш.

Қурултойда Ўзбекистон президентлигига Халқ демократик партиясидан кўрсатиладиган номзоднинг сайловолди дастури тасдиқланди.

Маълумот учун, Мақсуда Ворисова 1961 йил Тошкент шаҳрида туғилган. Тошкент давлат тиббиёт институтини тамомлаган, мутахассислиги бўйича шифокор. 2018 йилда I даражали «Соғлом авлод учун» ордени билан мукофотланган.