Тошкентда UzAuto Motors монополиясига бағишланган стрит-арт пайдо бўлди (видео)

Тошкентнинг Чилонзор туманида @inkUZart тахаллуси билан ижод қилаётган кўча рассоми Абдураҳмон томонидан чизилган яна бир стрит-арт пайдо бўлди. Бу сафар ижодкор UzAuto Motors компаниясининг монополиясига эътибор қаратган.

Эълон қилинган кадрларда Ўзбекистондаги автосалонларда машина харид қилиш учун юзага келаётган узундан узоқ навбат тасвирланган. Навбат бошида турган инсоннинг қизил бош кийими «шапка» тизимига ишора қилади.

https://www.instagram.com/p/CTZGT0YtTUg/

Таъкидланишича, мазкур стрит-арт намунаси эски Америка элчихонаси, Чилонзор савдо маркази яқинида чизилган.

Таъкидлаш керакки, UzAutoSavdo маълумотларига кўра, айни вақтда Lacetti’ни харид қилиш учун навбатда турганлар сони 31 мингга, Cobalt учун 11 мингга етган.

Аввалроқ @inkUZart Тошкентдаги бинолар деворларини коронавирус пандемияси мавзусидаги граффитилар билан безаётгани тўғрисида хабар берилганди.

2020 йилнинг ёзида Абдураҳмон Чилонзор туманидаги даҳаларни турли тасвирлар билан «бойитиш» ниятида эканини маълум қилганди. «Чилонзорни галереяга айлантирмоқчиман. Кейин эса бошқа туманлар, шаҳарлар, мамлакатлар ва қитъаларга ўтаман», — деган эди ўшанда.

Унинг сўзларига кўра, Чилонзор кўчаларида санъатга жой топиш қийин. Қонунчиликка кўра турар жой биноларининг деворларига чизишга рухсат берилмаган.