UzAuto Motors Tojikiston bozoriga kirmoqda

UzAuto Motors Tojikistonda to‘rtta Chevrolet modelini sotishni boshladi, deb xabar beradi kompaniya matbuot xizmati.

Qo‘shni mamlakatda sotuvga chiqqan modellar — Spark, Cobalt, Nexia va Lacetti.

Ma’lum bo‘lishicha, Lesinvest kompaniyaning rasmiy distribyutori sifatida Tojikistonda Chevrolet segmentatsiyasidagi avtomobillarni sotish va xizmat ko‘rsatish bo‘yicha faoliyatni boshqarib boradi.

Kompaniya avtomobillarni raqobatbardosh narxlarda sotishni ta’minlash maqsadida dilerlik tarmog‘ini rivojlantirish va Tojikiston banklari bilan hamkorlikda kredit dasturlarini ishga tushirishni rejalashtirgan.

“Shuningdek, Lesinvest Chevrolet avtomobillarining narxlar va sifat borasidagi raqobatbardosh ustunligi yordamida tojik bozorida uning savdolar hajmini oshirish va pozitsiyasini mustahkamlashni rejalashtirmoqda”, — deyiladi UzAuto Motors xabarida.

Shu bilan birga, ayni vaqtda O‘zbekistonda Chevrolet’ning mazkur modellarini xarid qilishga bo‘lgan navbat bir necha mingdan oshgan. UzAutoSavdo ma’lumotlariga ko‘ra, Lacetti’ni xarid qilish uchun navbatda turganlar soni 31 mingga, Cobalt uchun 11 mingga yetgan. Mavzuga doir: 

• O‘zbekistonda o‘tgan yetti oy ichida eng ko‘p Cobalt avtomobili ishlab chiqarildi
• O‘zbekistonda Spark uchun shartnoma tuzish bir muddat uzilishdan so‘ng yana tiklandi

Davlat statistika qo‘mitasi ma’lumotlariga ko‘ra, O‘zbekistonda 2021-yilning dastlabki olti oyida 108 780 dona yengil avtomobil ishlab chiqarilgan bo‘lib, bu 2020-yilning mos davriga nisbatan 34 675 donaga kam. 2021-yilda deyarli barcha modellarni ishlab chiqarish qisqargan, ayniqsa, bu Spark’ga qattiq ta’sir ko‘rsatgan — ushbu modelni ishlab chiqarish qariyb 60 foizga tushib ketgan.