Туркманистон Афғонистон, Ўзбекистон ва Қирғизистонга электр энергия экспортини ошириш мақсадида қуввати 432 мегаватт бўлган газ турбинали электростанцияни ишга туширди

3 сентябрь куни Туркманистоннинг Лебап вилоятида қуввати 432 мегаватт бўлган газ турбинали электростанция фойдаланишга топширилди, деб хабар беради Turkmenportal.

Маълум қилинишича, бу Марказий Осиё мамлакатлари, жумладан, Афғонистон, Ўзбекистон ва Қирғизистонга электр энергиясини етказиш ҳажмини оширишга хизмат қилади.

Объектнинг очилиш маросимида Туркманистон бош вазири ўринбосари Чорурот Пурчеков ва Япониянинг иқтисодиёт, савдо ва саноат вазири Киёси Эдзима иштирок этган. Лойиҳа Туркманистон Энергетика вазирлигининг «Туркманэнерго» давлат корпорацияси томонидан хорижий ҳамкорлар — Sumitomo Corporation ва Mitsubishi Power Ltd (Япония), Рöнесанс Ҳолдинг (Туркия) билан амалга оширилган.

Электростанция Япониянинг машҳур Mitsubishi Power Ltd газ турбиналари билан жиҳозланган бўлиб, бу каби технология мамлакат электр энергетикаси соҳаси тарихида биринчи бор қўлланмоқда. У ерда ҳар бири 144 мегаватт қувватга эга учта газ турбина генератори ўрнатилган.

Бунга қадар Туркманистон газ электростанциялари General Electric компаниясининг турбиналари билан жиҳозланар эди. Бугунги кунда Туркманистонда ишлаётган барча электростанцияларнинг умумий қуввати 6511 мегаваттни ташкил этмоқда. Лойиҳага Япониянинг халқаро ҳамкорлик бўйича банки Туркманистон Ташқи иқтисодий банки билан кредит келишуви орқали амалга ошириляпти.

Эслатиб ўтамиз, 2020 йилнинг январида носозлик сабабли Туркманистондан Ўзбекистонга электр энергияси етказиб бериш узилиб қолганди.