Канададаги олтин олди-сотдиси билан шуғулланувчи Kitco компанияси «Мурунтов» конини дунё бўйлаб олтин қазиб олинадиган энг йирик конларнинг навбатдаги рўйхатига қўшмади. Бу ҳақда компаниянинг сўнгги ҳисоботига таяниб, Spot хабар берди.
Kitco’нинг тушунтиришича, кон бўйича маълумотлар етарли эмас. Расмий маълумотлар олдин ҳам йўқ эди, бироқ компания «Мурунтов»ни тахминий маълумотлар асосида баҳолаган.
Масалан, 2020 йил якунлари бўйича Kitco «Мурунтов»ни биринчи ўринга қўйганди — бу ерда 2020 йилда 56,7 тонна олтин (2 миллион унция) қазиб олинган. Коннинг ресурс базаси 4 минг тоннадан ортиқ (150 миллион унция).
Ўзбекистонда қанча олтин бор?
Мамлакатда олтинга оид маълумотлар секин-аста очиқланмоқда. Март ойида Марказий банк 2010 йилдан 2020 йилга қадар олтин савдоси статистикасини эълон қилганди. Ўшанда Ўзбекистон сўнгги йилларда қимматбаҳо металл экспортини кескин оширгани аниқланган.
Давлат статистика қўмитаси мунтазам равишда олтин сотишдан мамлакат қанча даромад олаётгани ҳақида маълумот бериб келмоқда, лекин захиралар ва ишлаб чиқариш ҳақидаги маълумотлар ҳали ҳам ташқи ҳисоб-китобларга асосланган.
Аввалроқ Ўзбекистон олтин қазиб олувчи топ-10 мамлакатлар рўйхатига киритилган эди. Ўшанда Олтин бўйича бутунжаҳон кенгаши маълумотлари манба бўлиб хизмат қилган. Унга кўра, 2020 йилда мамлакат биринчи бор 100 тоннадан ортиқ олтин қазиб олган. Бу унга рейтингнинг 8-поғонасида жойлашган Перу ўрнини эгаллашга имкон берган.
Американинг Forbes нашри ўшанда мамлакатда дунёдаги энг йирик очиқ олтин кони — «Мурунтов» жойлашганини таъкидлаган эди.
Мавзуга доир: Ўзбекистон олтин экспортини яна тўхтатди
Изоҳ (0)