Тошкент шаҳар ИИББ пойтахт устунларига ўрнатилган давлат байроқларини ўзбошимчалик билан ечиб олиб, машиналарига ўрнатаётган шахслар жавобгарликка тортилиши мумкинлигини маълум қилди.
Маълум қилинишича, 1 сентябрь куни пойтахтнинг бир нечта туманларида транспорт воситаларининг ҳайдовчилари ва йўловчилари байрам муносабати билан ҳокимият томонидан ўрнатилган давлат байроқларини ўзбошимчалик билан ечиб олган. Улар ушбу байроқларни ўзларининг автомашинасига ўрнатиб, байрамни нишонламоқчи бўлган.
Бироқ байроқлар транспорт воситасига мустаҳкамлаб ўрнатилмаган, транспорт воситасидан ташқарига чиқиб туриши эса автомашинада ҳаракатланиш чоғида ноқулайликлар туғдириб, ҳаракат хавфсизлигига таҳдид солган. Шунингдек, ушбу ҳолатлар фуқаролар томонидан давлат рамзлари ва давлат мулки тўғрисидаги қонун талабларининг бузилишига олиб келган.
«Бу каби ҳуқуқбузарликларни содир этган шахслар Маъмурий жавобгарлик тўғрисидаги кодекснинг 203-1-моддасига кўра (давлат рамзлари тўғрисидаги қонунчиликни бузиш) маъмурий жавобгарликка тортилиши мумкинлигини унутманг. Ватанпарварлик ўз ватанингиз қонунларига нисбатан ҳурматсизлик билан муносабатда бўлишда намоён этилмаслиги керак. Ватанпарварликни қонунларга риоя этган ҳолда намоён қилинг», — дейилади идора муносабатида.
ИИВ ЙҲХББ ахборот хизматининг маълум қилишича, 1 сентябрь куни пойтахт кўчаларидаги устунларга ўрнатилган давлат байроғини ечиб, транспорт воситаларига илган ҳолда йўл ҳаракати қоидаларини четлаб ўтиб, гуруҳ-гуруҳ бўлиб, турли хавфли манёврлар қилиб ҳаракатланган ҳайдовчилар билан тушунтириш ишлари олиб борилган.
Изоҳ (0)